AQSh pen Ýkraına delegatsııalary beıbitshilik jospary týraly kelissóz júrgizip jatyr

ASTANA. KAZINFORM – Ýkraına Ulttyq qaýipsizdik jáne qorǵanys keńesiniń hatshysy Rústem Ýmerov Florıdada ýkraın jáne amerıkalyq delegatsııa arasyndaǵy kelissóz bastalǵanyn málimdedi, dep habarlaıdy BBC.

Olar Donald Tramp ákimshiligi Reseı tarapymen birlesip ázirlegen jáne Jenevada Ýkraına jáne eýropalyq eldermen jaqynda ótken kelissózderden keıin ózgertilgen beıbitshilik josparyn talqylap jatyr.

Konsýltatsııalar Maıamı mańynda, Donald Tramptyń arnaıy elshisi Stıv Ýıtkofftyń kompanııasy salǵan jeke Shell Bay golf klýbynda ótip jatyr.

Amerıka tarapy usynǵan jáne Reseımen birlesip ázirlegen bastapqy beıbitshilik josparynda 28 tarmaq boldy. Alaıda, Jenevada Ýkraına jáne eýropalyq seriktestermen keńeskennen keıin jospar ózgertildi.

Batys BAQ-tary eń kúrdeli máseleler - Amerıka Qurama Shtattarynyń aýmaqtyq jáne qaýipsizdik kepildikteri «jaqshaǵa alynyp», prezıdentter Donald Tramp pen Vladımır Zelenskııdiń qaraýyna qaldyrylýy múmkin ekenin habarlady.

Ótken aptada Shveıtsarııada Ýkraına boıynsha kelissóz aıaqtaldy. Jenevada ótken kelissózderden keıin AQSh Memlekettik hatshysy Marko Rýbıo Ýkraına sheneýnikterimen soǵysty toqtatý josparyn talqylaýda «aıtarlyqtaı ilgerileýshilik» bolǵanyn málimdedi.

Buǵan deıin Tramptyń Ýkraınadaǵy beıbitshilik jospary Florıda men Parıjde talqylanatynyn jazǵan bolatynbyz.