AQSh pen Soltústik Koreıanyń ekinshi sammıti sátsizdikke ushyrady
ASTANA. QazAqparat - Soltústik Koreıa kóshbasshysy Kım Chen Yn AQSh prezıdenti Donald Tramppen kelissózderden keıin beısenbi kúni Hanoe qonaqúıinen ketti, dep habarlaıdy QazAqparat Yonhap ońtústikkoreıalyq agenttigine silteme jasap.
Onyń habarlaýynsha, shamasy AQSh pen Soltústik Koreıa basshylary túski asqa barmaıdy.
Aq úı Tramp pen Kım Chen Ynnyń kelisimge qol jetkize almaǵanyn málimdedi.
«Qazirgi ýaqytta kelisim jasalǵan joq, biraq Tram pen Kımniń komandasy aldaǵy kezdesýdi asyǵa kútedi», - dedi Aq úıdiń baspasóz hatshysy Sara Sanders.
Bul málimdeme eki kóshbasshynyń sammıt ótetin jerden ketip, túski as pen kelisimge qol qoıý rásimin toqtatqannan keıin jarııalandy.
Qol qoıý rásimi jergilikti ýaqytpen 14.05-ke josparlanǵan edi.
Sondaı-aq, Sanders Tramp pen Kımniń jaqsy, konstrýktıvti kezdesý ótkizip, ıadrolyq qarýsyzdaný máselelerin talqylaǵanyn aıtty.
