AQSh pen Saýd Arabııasy beıbit atom energetıkasy týraly kelisimge qol qoıdy
ASTANA. KAZINFORM — AQSh pen Saýd Arabııasy beıbit atom energetıkasyn damytý salasyndaǵy yntymaqtastyq týraly kelisimge qol qoıdy, dep habarlaıdy TASS.
Qujat amerıkalyq kompanııalardyń Saýd Arabııasynyń ıadrolyq baǵdarlamasyn iske asyrýǵa qatysýyn kózdeıdi jáne qazir AQSh Kongresiniń qaraýyna joldanǵan.
AQSh Energetıka mınıstrliginiń málimetinshe, kelisimge 22 shildede AQSh-tyń Energetıka mınıstri Krıs Raıt pen Saýd Arabııasynyń Energetıka mınıstri hanzada Abdel Ázız ben Sálman Ál Saýd qol qoıǵan.
Qujat uzaq merzimge arnalǵan. AQSh tarapynyń málimdeýinshe, ol amerıkalyq kompanııalarǵa koroldiktiń atom energetıkasyn damytý jobalaryna qatysýǵa múmkindik beredi. Sonymen qatar yntymaqtastyq ıadrolyq qaýipsizdik pen ıadrolyq qarýdy taratpaý rejıminiń joǵary standarttaryna saı júzege asyrylatyny atap ótildi.
Krıs Raıttyń aıtýynsha, kelisim eki el arasyndaǵy atom energııasyn beıbit maqsatta paıdalaný salasyndaǵy áriptestikti nyǵaıtýǵa yqpal etedi.
Buǵan deıin The Wall Street Journal basylymy derekkózderge silteme jasap, kelisimniń 30 jylǵa deıin kúshinde bolýy múmkin ekenin jáne onda ondaǵan mıllıard dollar kólemindegi ınvestıtsııalar qarastyrylǵanyn habarlaǵan bolatyn. Basylymnyń jazýynsha, amerıkalyq kompanııalar Saýd Arabııasynyń ıadrolyq ınfraqurylymyn qurýda jetekshi ról atqarady.
Sondaı-aq jarııalanymǵa sáıkes, qujattaǵy tarmaqtardyń biri taraptar mundaı jobany oryndy dep tapqan jaǵdaıda, koroldik aýmaǵynda ýran baıytý kásipornyn salý múmkindigin qarastyrady.
Eske sala keteıik, Tramp mamyr aıynda Ibrahım kelisimin keńeıtýdi usynǵan bolatyn.
