AQSh pen Reseı prezıdentteri jaqyn kúnderi kezdesedi

ASTANA. KAZINFORM – Reseı men AQSh  Vladımır Pýtın men Donald Tramptyń kezdesýin kelisti, olar jaqyn kúnderi júzdesedi, dep habarlaıdy reseılik TASS.

Qazirgi tańda sammıtke daıarlyq júrip jatyr, dep málimdedi jýrnalısterge RF prezıdentiniń kómekshisi ıÝrıı Ýshakov.

Memleketter basshylarynyń kezdesý orny da kelisildi, ol týraly keshirek habarlanady.

- AQSh tarapynyń usynysy boıynsha jaqyn kúnderi joǵary deńgeıdegi ekijaqty, ıaǵnı Vladımır Pýtın men Donald Tramptyń kezdesýin uıymdastyrý týraly kelisildi,-dedi dıplomat.

Ýshakovtyń aıtýynsha, RF bıligi amerıkalyq áriptesterimen birge qajetti jumystardy naqtylaýǵa kiristi.

- Aıta ketetin másele, kezdesý ótetin oryn da kelisildi, ol týraly keshirek aıtamyz, - dedi Kreml ókili.

Buǵan deıin Tramp Ýkraınadaǵy qaqtyǵysty aıaqtaý boıynsha jaqsy jańalyq bar ekenin jáne Pýtınmen kezdesý týraly aıtty.

- Biz ázirge naqy sheshken joqpyz, biraq biz Pýtınmen jaqsy kelissóz júrgizdik,-dedi ol 6 tamyz kúni Reseı prezıdenti men óziniń arnaıy elshisi Stıven Ýıtkofftyń Máskeýdegi kezdesýin meńzep.

The New York Times basylymy osyǵan deıin derekkózge silteme jasaı otyryp, Tramptyń kelesi aptada Pýtınmen jeke kezdeskisi keletinin aıtqany týraly jazdy. Sol kezdesýden soń Tramp Vladımır Zelenskııdiń qatysýymen úshjaqty kezdesý ótkizbek.

CNN málimetteri boıynsha AQSh prezıdenti óziniń komandasyn kezdesýlerge daıyndyqty bastaýdy tapsyrǵan.

Osyǵan deıin Tramp Ýıtkoff pen Pýtınniń kezdesýin ónimdi dep ataǵany týraly jazdyq.