AQSh pen Ońtústik Koreıa arasyndaǵy saýda kelisimi jasalmaýy múmkin
ASTANA. KAZINFORM – Prezıdent Donald Tramp sársenbi kúni Kendjýda Ońtústik Koreıa prezıdenti Lı Chje Menmen saýda kelisimin jasasý úshin kezdesedi, dep habarlaıdy ABC News.
Alaıda Vashıngton men Seýldegi joǵary laýazymdy sheneýnikter Tramptyń Ońtústik Koreıanyń AQSh-qa 350 mlrd dollar ınvestıtsııa salý talaby kelisimge kelýge áli de kedergi bolyp otyrǵanyn málimdedi.
Koreıalyq sheneýnikter tikeleı aqsha quıý olardyń ekonomıkasyn turaqsyzdandyrýy múmkin ekenin jáne olar nesıe alǵandy jón kóretinin aıtty.
Tramptyń talaptary men Ońtústik Koreıa usyna alatyn nárseler arasyndaǵy sáıkessizdik AQSh pen Ońtústik Koreıa prezıdentteriniń kezdesýine kóleńke túsirý qaýpin týdyryp otyr.
Qazirgi kezde Ońtústik Koreıada avtomobılderge 25% baj salyǵy engizilgen. Bul Hyundai men Kia kompanııalaryn 15% baj engizgen japonııalyq jáne eýropalyq básekelesterimen salystyrǵanda qolaısyz jaǵdaıǵa qaldyrdy.
Qyrkúıek aıynda Djordjııadaǵy Hyundai zaýytyna AQSh ımmıgratsııalyq reıdi júrgizilgennen keıin jaǵdaı ýshyǵyp ketti. 300-den astam ońtústik koreıalyq ustalyp, bul atalǵan el azamattarynyń narazylyǵyn týdyrdy.
Lı habarlaǵandaı, eger vıza júıesi jaqsartylmasa, kompanııalar bolashaqta ınvestıtsııa salmaýy múmkin.
Qazan aıynyń basynda Ońtústik Koreıanyń Syrtqy ister mınıstrligi AQSh ońtústikkoreıalyq jumysshylardyń Amerıkadaǵy ónerkásiptik nysandar qurylysyna qatysý úshin qysqa merzimdi vızalarmen nemese vızadan bas tartý baǵdarlamasy boıynsha elge kirýine ruqsat berýge keliskenin jetkizdi.
Beısenbi kúni Ońtústik Koreıaǵa sapary kezinde Tramp Qytaı kóshbasshysy Sı Tszınpınmen kezdesedi dep kútilip otyr. Vashıngton men Beıjiń shıelenisti báseńdetýge daıyn ekenin málimdedi.
Tramp sonymen qatar Soltústik Koreıa kóshbasshysy Kım Chen Ynmen kezdesý múmkindigin meńzep, Kımniń onyń usynysyna áli jaýap bermegenine kóńili túskenin aıtty.
– Kım Chen Ynmen óte jaqsy til tabystym. Eger ol menimen kezdeskisi kelse, Ońtústik Koreıada bolamyn, - dedi Donald Tramp.
AQSh prezıdenti sondaı-aq Kımmen sóılesý múmkindigi bolsa, Ońtústik Koreıaǵa saparyn uzartýǵa daıyn ekenin málimdedi.
Buǵan deıin Donald Tramp pen Japonııa premer-mınıstri Sanae Takaıchı ekijaqty kezdesýdiń qorytyndysy boıynsha saýda jáne negizgi paıdaly qazbalar boıynsha eki kelisimge qol qoıǵanyn jazǵan bolatynbyz.
Birinshi kelisim AQSh-Japonııa alıansynda «jańa altyn ǵasyrdy» qarastyrdy jáne AQSh-taǵy japonııalyq ınvestıtsııanyń 550 mıllıard dollaryna aıyrbas retinde japon taýarlaryna 15% baj salyǵyn engizetin saýda kelisimin qamtydy.