AQSh pen Ońtústik Koreıa arasyndaǵy saýda kelisimi jasalmaýy múmkin
ASTANA. KAZINFORM – Prezıdent Donald Tramp sársenbi kúni Kendjý qalasynda saýda kelisimin aıaqtaý úshin Ońtústik Koreıa prezıdenti Lı Chje Menmen kezdesedi, dep habarlaıdy ABC News.
Alaıda Vashıngton men Seýldegi joǵary laýazymdy sheneýnikter Tramptyń Ońtústik Koreıanyń AQSh-qa 350 mlrd dollar ınvestıtsııa salý talaby kelisimge qol jetkizýge kedergi bolyp otyrǵanyn aıtady.
Koreıalyq sheneýnikterdń málimdeýinshe, tikeleı aqsha quıý olardyń ekonomıkasyn turaqsyzdandyrýy múmkin jáne olar nesıe alǵandy jón kóredi.
Tramptyń talaby men Ońtústik Koreıanyń usynysy arasyndaǵy alshaqtyq eki el prezıdentteriniń kezdesýine kóleńke túsirý qaýpin týdyrady.
Ońtústik Koreıa qazirgi kezde avtomobılderge 25% tarıf engizdi, bul Hyundai men Kia kompanııalaryn 15% tarıf engizetin japondyq jáne eýropalyq básekelesterimen salystyrǵanda qolaısyz jaǵdaıǵa qaldyrdy.
Qyrkúıek aıynda Djordjııadaǵy Hyundai zaýytyna AQSh ımmıgratsııalyq reıdi júrgizilgennen keıin jaǵdaı ýshyǵyp ketti. 300-den astam ońtústik koreıalyq ustaldy, bul narazylyq pen opasyzdyq sezimin týdyrdy.
Lı eger vıza júıesi jaqsarmasa, kompanııalar bolashaqqa ınvestıtsııa salmaıtynyn habarlady.
Qazan aıynyń basynda Ońtústik Koreıanyń Syrtqy ister mınıstrligi AQSh ońtústikkoreıalyq jumysshylardyń Amerıkadaǵy ónerkásiptik nysandar qurylysyna qatysý úshin qysqa merzimdi vızalarmen nemese vızasyz baǵdarlama boıynsha elge kirýine ruqsat berýge keliskenin málimdedi.
Tramp beısenbi kúni Ońtústik Koreıaǵa sapary kezinde Qytaı kóshbasshysy Sı Tszınpınmen kezdesedi dep kútilip otyr. Vashıngton men Beıjiń shıelenisti tarqatýǵa daıyn ekenin málimdedi.
Tramp sonymen qatar Soltústik Koreıa kóshbasshysy Kım Chen Ynmen kezdesý múmkindigin meńzep, Kımniń onyń usynysyna áli jaýap bermegenine kóńili qalǵanyn bildirdi.
- Men Kım Chen Ynmen óte jaqsy til tabystym. Maǵan ol unady. Ol da meni unatty. Eger ol ynta bildirse, Ońtústik Koreıada kezdesýimizge bolady, - dedi Donald Tramp.
Sondaı-aq, Tramp Kımmen sóılesý múmkindigi bolsa, Ońtústik Koreıaǵa saparyn uzartýǵa daıyn ekenin málimdedi.
Buǵan deıin AQSh prezıdenti Donald Tramp pen Japonııa premer-mınıstri Sanae Takaıtı eki jaqty kezdesýden keıin saýda jáne mańyzdy mıneraldar týraly eki kelisimge qol qoıǵan bolatyn.