AQSh pen NATO M.Kaddafı rejımin qulatý máselesin áskerı jolmen sheshý týraly kelissóz júrgizýde
ASTANA. 1 naýryz. QazAqparat - Qurama Shtattar Lıvııa basshysy Mýammar Kaddafıdiń rejımin qulatý máselesin «áskerı jolmen» sheshýdiń múmkindikteri týraly NATO basshylyǵymen kelissóz júrgizýde.
AQSh-tyń BUU janyndaǵy elshisi Sıýzan Raıs búgin osyndaı málimdeme jasady. Dıplomattyń aıtýynsha, Vashıngton bul máseleni basqa da odaqtastarymen talqylap jatyr, dep habarlaıdy Reuters agenttigi.
Qazirgi tańda álemdik qaýymdastyqtyń birqatar elderi Kaddafıdiń rejımin qulatý úshin áskerı kúshterdi qoldanýdyń múmkindigin talqylap jatyr. Degenmen, ondaı áreketke barý úshin birqatar sharttardyń bolý kerek ekendigi aıtylýda.
Atap aıtqanda, AQSh memlekettik hatshysy Hılları Klınton, Lıvııanyń qarapaıym halqyna zardap keltirilmeıtin jaǵdaıda ǵana, halyqaralyq qaýymdastyqtyń joǵarydaǵydaı sharalarǵa bara alatynyn málim etti.
Osydan birer saǵat buryn málim bolǵandaı, AQSh Lıvııa shekarasynyń mańyna ásker jetkizip jatqan kórinedi. Amerıkan armııasy áskerı-teńiz jáne áskerı-áýe kúshteriniń birneshe myńdaǵan jaýyngeri eldiń shekarasyna qaraı jyljyp kele jatyr, deıdi derek kózder. Pentagonnyń aıtýynsha, qalyptasqan jaǵdaı osyndaı qajettilik týǵyzyp otyr, biraq amerıkandyq áskerıler bul qadamdardyń qandaı maqsatta jasalyp otyrǵany týraly aıtýdan bas tartýda.
