AQSh pen Kýba 10 jylda alǵash ret kelissózder ótkizdi
ASTANA. KAZINFORM — Jarııa etilmegen sapar barysynda AQSh Memlekettik departamentiniń delegatsııasy 2016 jyldan beri alǵash ret Gavanaǵa baryp, Kýba basshylyǵy ókilderimen birqatar kezdesý ótkizdi, dep jazady DW Axios-ke silteme jasap.
Resmı túrde jarııalanbaǵan bul sapar AQSh-tyń burynǵy prezıdenti Barak Obamanyń 2016 jylǵy saparynan keıingi alǵashqysy ekeni atap ótildi.
Derekkózdiń aıtýynsha, Gavanada birneshe kezdesý ótken. Qatysýshylardyń biri retinde Raýl Gılermo Rodrıges Kastro — burynǵy kýbalyq kóshbasshy Raýl Kastronyń nemeresi atalǵan. Ol AQSh tarapynan is júzinde sheshim qabyldaýǵa yqpal etetin tulǵa retinde qarastyrylady.
17 sáýirde The Wall Street Journal basylymy Raýl Rodrıges Kastro AQSh prezıdenti Donald Trampqa resmı emes arna arqyly hat joldaýǵa tyrysqanyn jazdy. Onda ol sanktsııalardy jumsartý esesine ekonomıkalyq jáne ınvestıtsııalyq kelisimder usynǵany aıtylǵan.
Kelissózderdiń negizgi taqyryby — araldaǵy reformalar
Axios málimetinshe, kelissózderdiń basty taqyryby Kýbada aýqymdy saıası jáne ekonomıkalyq reformalar júrgizý bolǵan. Vashıngton bul qadamdar jasalǵan jaǵdaıda ekonomıkalyq kómek kórsetýge, sonyń ishinde uzaq jyldarǵa sozylǵan saýda embargosyn jumsartýǵa jáne Starlink spýtnıktik baılanysyna qoljetimdilik berýge daıyn ekenin jetkizgen.
AQSh ókilderi Kýba ekonomıkasy aýyr jaǵdaıda ekenin eskertip, reformalar úshin «ýaqyt óte shekteýli» ekenin de eskertken.
Tramptyń málimdemesi
Sonymen qatar, 18 sáýirge qaraǵan túni Donald Tramp Kýbaǵa qatysty áskerı operatsııa bolýy múmkin ekenin aıtyp, ony «kýba halqy úshin jańa dáýirdiń bastalýy» dep ataǵan.
— Óte jaqyn ýaqytta bul uly kúsh 70 jyl boıy daıyndalǵan kúndi alyp keledi. Ol «Kýba úshin jańa tań» dep atalady. Biz Kýbaǵa kómektesemiz. Bizde kóptegen tamasha kýbalyq amerıkalyq bar, olarǵa qataldyq kórsetilgen, otbasylary óltirilgen, olar qorlyq kórgen adamdar. Endi ne bolatynyn kórińizder, — dedi Tramp Turning Point USA is-sharasynda.
AQSh prezıdenti sondaı-aq ózin qaıtadan «bitimger» dep atap, «segiz soǵysty rettegenin» aıtty, sonymen qosa «keıde aralasýǵa týra keledi» dep qosty. Ol sondaı-aq bul operatsııa kýbalyq halyqqa «kópten kútken erkindik» ákeletinin atap ótti.
AQSh pen Kýba arasyndaǵy shıelenis
2026 jyldan bastap AQSh Kýbaǵa qysymdy kúsheıtip, janarmaı jetkizilimine shekteý engizgeni habarlanǵan. Bul elde energetıkalyq daǵdarys pen elektr jaryǵynyń jıi óshýine ákelgen.
Kýba prezıdenti Mıgel Dıas-Kanel AQSh sharalaryn qatań synǵa alǵanymen, naýryz aıynda eki el arasynda kelissózder bastalǵany týraly málimdegen.
Osyǵan deıin AQSh áskerı kúshteri Donald Tramp buıryq berse, Kýbada Pentagon operatsııasyn júrgizýdi josparlap otyrǵanyn jazǵanbyz.
