AQSh pen Kolýmbııa mıgranttarǵa qatysty kelisimge keldi

ASTANA. KAZINFORM — Immıgratsııa men baj salyǵy boıynsha kelisimge kelgen taraptar tarıfterdi engizý týraly ózara qoqan-loqqyny toqtatty, dep habarlaıdy Kazinform menshikti tilshisi.

— Kolýmbııa úkimeti prezıdent Donald Tramptyń barlyq shartymen, sonyń ishinde Kolýmbııadan Qurama Shtattarǵa qaıtarylatyn barlyq zańsyz ımmıgranttardy amerıkalyq áskerı ushaqtarymen shekteýsiz nemese kidirissiz qabyldaýǵa kelisti, — dep málimdedi Aq úıdiń baspasóz hatshysy Karolın Lıvıtt The Hill suranysyna jaýap retinde.

Kolýmbııa kelisimdi buzbasa, AQSh-tyń tarıfteri men sanktsııalary keıinge qaldyrylady jáne oǵan qol qoıylmaıdy. Memlekettik departament engizgen vızalyq sanktsııalar jáne keden men shekarany qorǵaý qyzmetiniń kúsheıtilgen tekserýleri deportatsııalanǵan kolýmbııalyqtardyń birinshi ushaǵy Kolýmbııaǵa sátti jetkizilgenshe kúshinde qalady.

Jeksenbi kúni Kolýmbııa prezıdenti Gýstavo Petro prezıdent Donald Tramptyń tarıfteri men sanktsııalaryna jaýap retinde Qurama Shtattardan keletin taýarlarǵa ımporttyq baj salyǵyn 25 paıyzǵa arttyrýdy buıyrdy. 

— Kolýmbııanyń Syrtqy saýda mınıstrine AQSh taýarlaryna ımporttyq baj salyǵyn kóterý jáne Kolýmbııa eksportyn AQSh-tan basqa elderge keńeıtýge kómektesý tapsyryldy. Baǵasy kóteriletin amerıkalyq ónimderdi ózimizde óndirilgen ónimder almastyrý kerek jáne úkimet bul turǵyda kómek kórsetedi, — delingen Kolýmbııa prezıdentiniń málimdemesinde.

Bul prezıdent Tramptyń Kolýmbııaǵa qarsy AQSh-qa kiretin barlyq taýarǵa 25% baj salyǵyn engizý, sondaı-aq Ońtústik Amerıka eli mıgranttardyń eki ushaǵyn qabyldaýdan bas tartqannan keıin úkimet sheneýnikteriniń saparǵa shyǵýyna tyıym salý jáne vızany alyp tastaý týraly sharalaryna jaýap boldy.

Eske salsaq, budan buryn Tramp mıgranttardy qabyldaýdan bas tartqan Kolýmbııaǵa sanktsııa salǵanyn jazdyq.