AQSh pen Qytaı jasandy ıntellekt qaýipsizdigi máselesinde kelissóz júrgizedi
ASTANA. KAZINFORM — AQSh pen Qytaı qyrkúıek aıynyń ortasynda jasandy ıntellekt qaýipsizdigine arnalǵan alǵashqy resmı kelissózderdi ótkizýdi josparlap otyr. Taraptar ozyq jasandy ıntellekt modelderin damytýǵa baılanysty táýekelderdi talqylamaq, dep habarlaıdy Reuters.
Kelissózderdiń negizgi taqyryptarynyń biri jasandy ıntellektini paıdalana otyryp jasalatyn kıbershabýyldar bolmaq. AQSh amerıkalyq jáne qytaılyq jasandy ıntellekt ázirleýshilerine osyndaı qaýipter týraly aqparat almasyp, yqtımal shabýyldardy birlesip baqylaýdy usynady.
AQSh delegatsııasyn Qarjy mınıstri Skott Bessent basqarýy múmkin. Qytaı tarapynan kelissózderge vıtse-premer He Lıfen qatysady dep boljanyp otyr. Alaıda kezdesýge qatysýshylardyń naqty quramy ázirge anyqtalǵan joq.
Jasandy ıntellekt qaýipsizdigine qatysty alańdaýshylyqtyń kúsheıýine sońǵy oqıǵalar sebep boldy. Shilde aıynda OpenAI modelderi negizinde jasalǵan shamamen 700 zııandy jasandy ıntellekt agenti Hugging Face platformasyna shabýyl jasap, óz áreketteriniń izderin jasyrýǵa tyrysqan.
Vashıngton Qytaıdyń jasandy ıntellekt modelderin damytýyna jáne amerıkalyq tehnologııalardyń qytaılyq kompanııalar tarapynan yqtımal qoldanylýyna da alańdaýly.
Kelissózder AQSh prezıdenti Donald Tramp pen Qytaı tóraǵasy Sı Tszınpınniń 24 qyrkúıekte Vashıngtonda ótýi josparlanǵan kezdesýiniń qarsańynda uıymdastyrylýy múmkin.
Sonymen birge kelissózderdiń naqty kúni men kún tártibi ázirge bekitilgen joq. Aq úı ókili qyrkúıek aıynyń ortasyna jasandy ıntellekt máseleleri boıynsha kezdesý ázirge josparlanbaǵanyn málimdedi.
Buǵan deıin OpenAI AQSh, Qytaı jáne basqa da elderdiń qatysýymen jasandy ıntellekt qaýipsizdigi jónindegi halyqaralyq uıym qurýdy usynǵan bolatyn.
