AQSh pen Qytaı TikTok boıynsha aldyn ala kelisimge keldi

ASTANA. KAZINFORM – AQSh pen Qytaı TikTok áleýmettik jelisin AQSh baqylaýyna berý jóninde aldyn ala kelisimge keldi. Bul týraly Reuters habarlady.

Resmı málimetke sáıkes, kelisimdi juma kúni AQSh prezıdenti Donald Tramp pen Qytaı Halyq Respýblıkasynyń tóraǵasy Sı Tszınpın arasyndaǵy telefon arqyly áńgime barysynda rastaý josparlanyp otyr. Bul týraly AQSh Qarjy mınıstri Madrıdte Qytaı ókilderimen ótken kelissózderden keıin málimdedi.

Mınıstrdiń aıtýynsha, TikTok-tyń AQSh-taǵy jumysyna qaýip tóndirgen 17 qyrkúıek merzimi qytaılyq delegatsııany mámilege kelýge ıtermelegen. Ol kelisimdi aıaqtaý úshin bul merzimdi taǵy 90 kúnge uzartýǵa bolatynyn atap ótti, biraq basqa aqparat berýden bas tartty.

– Olardy qosymshanyń qytaılyq ereksheligi qyzyqtyrady, ony olar «jumsaq kúshtiń» kórinisi dep esepteıdi. Bizdi qytaılyq erekshelik alańdatpaıdy. Bizdi alańdatatyny – ulttyq qaýipsizdik, – dedi mınıstr Bessent Madrıdtegi kelissózden keıin.

Bul - bıyl taraptardyń TikTok boıynsha kelisimge jaqyndaǵany jóninde ekinshi márte málimdeýi. Buǵan deıin naýryzda osyndaı habarlanǵanymen, ol úmitti aqtamaǵan bolatyn.

Sáýir aıynyń basynda TikTok aktıvterin AQSh-ta bólýge qatysty kelisim toqtatylǵan edi. Qytaı bıligi ol kezde AQSh prezıdenti Donald Tramp engizgen kedendik baj salyǵyna baılanysty kelisimdi qabyldamaıtynyn jarııalaǵan.

Eske sala ketsek, 2024 jyly AQSh-tyń 46-prezıdenti Djo Baıden qytaılyq ByteDance kompanııasyn TikTok-ty satý nemese el aýmaǵyndaǵy qyzmetin toqtatý jónindegi zańǵa qol qoıǵan.

Alaıda 2025 jylǵy 20 qańtarda ınaýgýratsııadan keıin Donald Tramp bul platformany AQSh-ta buǵattaýdy kem degende 75 kúnge (5 sáýirge deıin) shegeretin jarlyqqa qol qoıdy. Ol buǵan deıin TikTok-qa «jyly qaraıtynyn» aıtqan, sebebi bul jeliniń jas amerıkalyq paıdalanýshylary onyń 2024 jylǵy qarashadaǵy saılaýdaǵy jeńisine yqpal etken bolatyn.