AQSh pen Qytaı prezıdentiniń kezdesýi Ortalyq Azııaǵa qalaı áser etedi – sarapshy pikiri
TAShKENT. KAZINFORM – Donald Tramp ákimshiliginiń Qytaımen dıalogty júıeli jolǵa qoıa alatynyna senim az. Muny AQSh prezıdentiniń Beıjińge jasaǵan saparyna qatysty pikir bildirgen beldi ózbekstandyq saıasattanýshy, «Bilim kerýeni» ǵylymı bilim berý mekemesiniń dırektory Farhod Tolıpov aıtty, dep habarlaıdy Kazinform agenttiginiń Tashkenttegi menshikti tilshisi.
– Donald Tramp pen Sı Tszınpın kezdesýi beıbitshilik pen turaqtylyqty qamtamasyz etýge baǵyttalǵan qadam emes. Álemdik derjava mártebesine úmitti eki memlekettiń jahandyq máselelerdi sheshýge nemese naqty nátıjelerge qol jetkizýge degen umtylysy baıqalmaıdy. Sondyqtan bul sapar AQSh úshin tek pragmatıkalyq múddeni kózdeıdi. Oǵan Tramptyń úlken delegatsııamen barǵany anyq dálel. Bárimiz baıqaǵandaı, onyń ishinde álemdik alpaýyt kompanııalardyń basshylary bar. Meniń oıymsha, mıllıarderler Qytaıǵa qandaı da bir kelisim jasaýǵa qaraǵanda, álemdegi eń yqpaldy kásiporyndardyń barlyǵy amerıkalyq degen ıdeıany alǵa tarta otyryp, ústemdik áser qaldyrý mıssııasymen bardy. Bul - AQSh eń yqpaldy, áskeri áldi memleket degen oılardy jıi qaıtalaıtyn Aqúı basshysynyń ustanymyna tolyq saı bolyp otyr. Tıisinshe, sapar naqty nátıjege emes, Tramptyń halyqaralyq arenadaǵy myqty saıasatker obrazyn qalyptastyrýǵa baǵyttalǵan, - dep pikir bildirdi ózbekstandyq sarapshy.
Farhod Tolıpov atap ótkendeı, Donald Tramp bılikke kelgeli beri resmı Vashıngtonnyń saıasaty turaqsyz. Bul rette ony Qytaımen qarym-qatynas retteı almaýy múmkin.
– Tramp bılikke kelgen alǵashqy kúnnen bastap turaqsyz saıasat ustanyp keledi. Sáıkesinshe, qytaılyq tarap ony túzep, tıimdi baǵytqa bura almaıdy. Sondaı-aq, resmı Beıjiń Shanhaı yntymaqtastyq uıymy jáne BRIKS sııaqty formattar aıasynda táýelsiz saıasat júrgizedi. Al bul platformalarǵa AQSh qatyspaıdy. Sondyqtan Tramp ákimshiliginiń Qytaımen dıalogty júıeli jolǵa qoıa alatynyna senim az, - dedi F.Tolıpov.
Sonymen qatar saıasattanýshy Donald Tramp pen Sı Tszınpın kelissózderiniń Ortalyq Azııa aımaǵyna qandaı áseri bolýy múmkin ekenin aıtty.
– Meniń oıymsha, bul Ortalyq Azııa elderiniń ózine baılanysty. Sarapshylar bizdiń aımaq týraly sóz qozǵaǵanda, olar bul máselege iri derjavalardyń kózqarasy turǵysynan qaraıdy. Bul jerde olar óńir memleketteriniń ulttyq múddelerin eskermeıdi. Sondyqtan osy faktordy basshylyqqa ala otyryp, jaǵdaıdy sapaly taldaý mańyzdy. Qazirgi ýaqytta álemde qalyptasqan turaqsyzdyq Ortalyq Azııa elderi arasyndaǵy ıntegratsııany nyǵaıtýǵa ıtermeleıdi. Bul aımaqtaný protsesin jedeldetýge serpin beredi. AQSh pen Qytaı basshylarynyń kezdesýi Túrki memleketteri uıymynyń beıresmı sammıtimen tuspa-tus keldi. Bul kezdeısoq jaıt emes. Meniń oıymsha, prezıdentter Túrikstanda osy málelelerdi de eskerdi, - dep túıindedi Farhod Tolıpov.
Eske salaıyq, Tramp 8 jyldan astam ýaqyttan keıin alǵash ret Qytaıǵa bardy. Keıin Sı Tszınpın men Donald Tramp Beıjińde kelissóz júrgizdi.
Sapar qorytyndysy boıynsha Tramp Sı Tszınpındi qyrkúıek aıynda AQSh-qa shaqyrdy.
Buǵan deıin Beıjińdegi jyly atmosfera astarynda qandaı geosaıası esep jatqany jaıly jazyp edik.
