AQSh pen Qytaı delegatsııalary arasynda ekijaqty kelissóz bastaldy
ASTANA. KAZINFORM – Donald Tramp pen Sı Tszınpın Halyq jınalystarynyń úlken zalynda ekijaqty kelissózdi bastady, dep habarlaıdy NBC News.
Sı Tszınpın kirispe sózinde AQSh-Izraıl soǵysy nemese basqa da jahandyq qaqtyǵystar týraly eshteńe aıtpaı, ekijaqty qarym-qatynastaǵy turaqtylyqty qamtamasyz etýge jalpy úndeýlermen shekteldi.
– Qytaı men AQSh-tyń ortaq múddeleri bizdiń kelispeýshilikterimizden basym. Qytaılyq-amerıkalyq qarym-qatynasyndaǵy turaqtylyq – búkil álem ıgiligi, - dedi Sı Tszınpın.
Sı Tszınpınniń aıtýynsha, qazir másele «Qytaı men AQSh-tyń Fýkıdıd tuzaǵyn jeńip, iri derjavalar qarym-qatynasy úshin jańa paradıgma jasaı ala ma?» degen suraqta, bul ósip kele jatqan derjava qalyptasqan derjavaǵa qaýip tóndirgen kezdegi qaqtyǵystarǵa beıimdilikke qatysty.
– Biz básekeles emes, seriktes bolýymyz kerek, tabysqa birge jetip, birge órkendep, iri elderdiń jańa dáýirde ózara árekettesýiniń durys jolyn tabýymyz kerek, - dep tolyqtyrdy sózin Sı Tszınpın.
Tramp sonymen qatar Sı Tszınpınmen kezdesýine kóleńke túsirip, sammıttiń alty aptaǵa keıinge qaldyrylýyna ákelgen Irandaǵy soǵys týraly aıtýdan aýlaq boldy.
Tramp Qytaımen iskerlik qarym-qatynas ornatý múmkindigin asyǵa kútetinin, ol úshin sammıtke álemdegi «eń iri bıznesmenderdi» shaqyrǵanyn málimdedi.
– Men tek joǵary basshylyqty kórgim keldi, olar búgin sizge jáne Qytaıǵa qurmet kórsetý úshin osynda jınaldy. Olar saýdanyń bastalyp, bıznes júrgizilýin asyǵa kútip otyr jáne biz tek ózara tıimdi sharttarmen jumys isteımiz, - dep málimdedi Donald Tramp.
Sı Tszınpın men Tramptyń AQSh-Qytaı qarym-qatynasy týraly kirispe sózderinen keıin ekijaqty kelissóz jabyq esik artynda jalǵasty.
Osyǵan deıin Tramptyń 8 jyldan astam ýaqyttan keıin alǵash ret Qytaıǵa barǵany habarlandy.
