AQSh pen QHR ásker basshylary bir jylda birinshi ret kelissóz júrgizdi
Pentagon men QHAA qorǵanys salasyndaǵy seriktestikti talqylady. Bul – eki eldiń áskerı vedomstvolary arasyndaǵy baılanysty qalpyna keltirý josparlanǵaly bolǵan bir jyldan astam ýaqyt ishindegi alǵashqy kezdesý, dep habarlady Kazinform agenttigi «Golos Amerıkı» basylymyna silteme jasap.
Beısenbi kúni joǵary shendi amerıkalyq áskerbasy qytaılyq áriptesimen vırtýal kezdesý ótkizdi, dep habarlady AQSh qorǵanys mınıstrligi.
Beınekonferentsııa ótken aıda prezıdent Djo Baıden men QHR tóraǵasy Sı Tszınpın arasynda bolǵan áskerı mınıstrlikterdiń baılanysyn qalpyna keltirý týraly kelisim nátıjesinde bolyp otyr. Eki el baılanysy 2022 jylǵy tamyzda Ókilder palatasynyń spıkeri Nensı Pelosıdiń Taıvanǵa saparynan keıin úzilgenin eske sala keteıik.
AQSh ÁÁK generaly, Shtab basshylary birikken komıtetiniń tóraǵasy Charlz Braýn men Qytaı halyq-azattyq armııasy (QHAA) generaly Lıý Chjenlı kelissóz kezinde «jahandyq jáne óńirlik qaýipsizdik máselelerin» talqylady, dep habarlady Braýn keńsesi.
Lıý – Ortalyq áskerı komıssııa birikken shtaby, áskerı operatsııalarǵa jáne áskerı josparlaýǵa jaýapty qytaılyq organ basshysy.
Pentagon ókilderi eki el áskeriniń baılanysy janjalǵa aınalyp ketýi múmkin oqıǵalardyń aldyn alatynyn atap ótti.
«General Braýn básekelestikti basqarý, qatelikti boldyrmaý jáne ashyq, tikeleı baılanys jelilerin saqtap turý úshin birlesip jumys isteýdiń mańyzyn talqylady», - dep habarlady Braýn keńsesi.
Braýn ótken aıda Lıý myrzaǵa hat joldap, kezdesýge daıyn ekenin habarlaǵanyn aıtty.
Qytaı qorǵanys mınıstrliginiń resmı málimdemesi boıynsha, Lıý AQSh pen Qytaı arasyndaǵy saý, turaqty jáne berik qarym-qatynas kilti «Qytaıdy durys túsiný» ekenin málim etken.
AQSh resmı ókilderi áskerı kommýnıkatsııa qalpyna keltirildi degenmen, shynynda eki taraptyń tolyq dıalogqa kelýine biraz ýaqyt qajet bolýy múmkin ekenin eskertti.
