AQSh pen Qatar qorǵanys salasyndaǵy keńeıtilgen yntymaqtastyq kelisimine jaqyn
ASTANA. KAZINFORM - Izraıldiń Dohaǵa shabýyly aımaqtyq alıanstar qarqyndylyǵy men AQSh-Qatar dıalogyna áser etip jatyr, dep habarlaıdy Kazinform menshikti tilshisi.
AQSh pen Qatar qorǵanys salasyndaǵy yntymaqtastyqtyń jańartylǵan kelisimi boıynsha kelissózdiń sońǵy satysynda tur. Bul týraly AQSh memlekettik hatshysy Marko Rýbıo seısenbi kúni Dohaǵa ushar aldynda Tel-Avıvte tilshiler aldynda sóılegen sózinde aıtty.
- Bizde qatarlyqtarmen tyǵyz seriktestik bar. Іs júzinde bizde qorǵanys salasyndaǵy yntymaqtastyq týraly keńeıtilgen kelisim bar, ol boıynsha biz jumys istep jatyrmyz jáne ol aıaqtalýǵa jaqyn, - dedi Rýbıo.
Ol Vashıngtonnyń Qatardan Gaza sektoryndaǵy atysty toqtatý kelissózindegi deldaldyq rólin jalǵastyrýyn kútetinin basa aıtty.
- Eger buǵan kómektesetin el bolsa, ol Qatar. Olardyń buǵan múmkindikteri bar, - dep qosty dıplomat.
Rýbıonyń málimdemesi Dohada ótip jatqan tótenshe arab-ıslam sammıti tusynda jasaldy. Izraıldiń el astanasynda HAMAS qaıratkerlerine jasaǵan shabýyly aımaqta keńinen aıyptalǵannan keıin forým Qatarmen yntymaqtastyǵyn bildirdi.
Qatar bul shabýyldy «qorqaq jáne opasyz» dep sıpattady, biraq Mysyr jáne AQSh-pen deldaldyq mıssııany jalǵastyrý nıetin rastady.
Aq úı buǵan deıin Dohaǵa qoldaý kórsetetinine sendirgen bolatyn. Mamyr aıyndaǵy sapary kezinde prezıdent Donald Tramp eger qaýip tónse, AQSh Qatardy qorǵaıdy dep ýáde etken. Izraıldiń shabýylynan keıin Amerıka ákimshiliginiń basshysy B.Netanıahýdyń áreketine narazylyǵyn bildirip, ony birjaqty dep atady jáne Amerıkanyń da, Izraıldiń de múddesine saı emes ekenin alǵa tartty.
- Biz mundaı áreketterdiń qaıtalanbaıtynyna senimdi bolǵymyz keledi, - dedi Tramp Nıý-Iorkte Qatar premer-mınıstrimen kezdesýinde.
Qatar Vashıngtonnyń aımaqtaǵy negizgi odaqtasy bolyp qalyp otyr, AQSh-tyń Taıaý Shyǵystaǵy eń iri áskerı bazasy osynda ornalasqan. Qorǵanys salasyndaǵy yntymaqtastyqty tereńdetý AQSh-tyń aımaqtyq shıelenis pen Izraılmen kelispeýshilik jaǵdaıynda Dohanyń qaýipsizdik kepildigin kúsheıtý nıetiniń belgisi retinde qarastyrylyp otyr.
Aıta keteıik, buǵan deıin Tramp Izraıldiń endi Qatarǵa soqqy jasamaıtynyn habarlady.