AQSh pen Izraıldiń soqqysynan keıin Iranda 300-den astam bala aýrýhanaǵa tústi

ASTANA. KAZINFORM — AQSh pen Izraıldiń Iranǵa jasaǵan soqqylary saldarynan 300-den astam bala zardap shekti, dep habarlaıdy TASS.

Bul týraly Iran jedel járdem qyzmetiniń basshysy Djafar Mıadfar habarlady.

— Shabýyldarda qaza tapqandardyń eń jasy - bir jasta, al jaralanǵandardyń eń kishisi - alty aılyq. Qazirgi ýaqytta 300-den astam 18 jasqa deıingi bala men jasóspirim aýrýhanada jatyr, — dedi ol memlekettik telearnada.

Buǵan deıin Irannyń ońtústigindegi Mınab qalasynda qyzdarǵa arnalǵan bastaýysh mektepke jasalǵan ızraıldik soqqy saldarynan 40 adam qaza tapty.

QR Prezıdenti janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııa Iran aýmaǵyna qarýly shabýyl kezinde balalardyń qaza bolýyna baılanysty týystary men jaqyndaryna kóńil aıtty.

Iran, Izraıl jáne AQSh arasyndaǵy qaqtyǵys ózara shabýyldarmen, qatal saıası rıtorıkamen jáne aımaqtyq shıelenistiń odan ári ýshyǵý qaýpimen birge órbip tur. Keshegi kúnge deıingi jaǵdaı boıynsha eki tarap áskerı operatsııalardyń joǵary qarqyndylyǵyn saqtap otyr, al dıplomatııalyq sıgnaldar shıelenistiń tómendeý belgileriniń joqtyǵyn kórsetedi.

Aıta keteıik, BUU Taıaý Shyǵystaǵy shıelenistiń gýmanıtarlyq saldary aýyr bolatynyn eskertti.