AQSh pen Izraıldiń Iranǵa jasaǵan áýe soqqylarynan 216 bala kóz jumdy - BUU
ASTANA. KAZINFORM – Iranǵa qatysty táýelsiz halyqaralyq faktilerdi anyqtaý mıssııasy Taıaý Shyǵystaǵy qaqtyǵysqa qatysýshy barlyq tarapty soǵys qımyldaryn dereý toqtatýǵa jáne halyqaralyq quqyqty tolyq saqtaýǵa shaqyrdy, dep habarlaıdy BUU.
Mıssııa málimetinshe, AQSh pen Izraıldiń Iran aýmaǵyna jasaǵan áýe soqqylary azamattyq ınfraqurylymnyń aýqymdy qıraýyna ákelgen. Atap aıtqanda, aýrýhanalar, ǵylymı ortalyqtar, mektepter men ýnıversıtetter zaqymdanǵan.
Aldyn ala derekter boıynsha, 3 myńnan astam adam qaza tapqan, olardyń ishinde 216 bala men 251 áıel bar. Sondaı-aq Iran Qyzyl Jarty aı uıymynyń qyzmetkerleri de kóz jumǵan. Myńdaǵan adam jaraqat alǵan.
Sarapshylardyń atap ótýinshe, eger bul málimetter rastalsa, keıbir jaǵdaılar áskerı qylmys retinde baǵalanýy múmkin, ásirese azamattyq nysandarǵa qasaqana soqqy jasaý nemese shamadan tys kúsh qoldaný faktileri nazar aýdartady.
Mıssııa medıtsınalyq jáne bilim berý mekemeleriniń joıylýyna erekshe alańdaýshylyq bildirdi. Málimetke sáıkes, 315 klınıka, 760 mektep jáne 29 ýnıversıtet zaqymdanǵan. Onyń ishinde Tegerandaǵy Paster ınstıtýty men onkologııalyq jáne aýtoımmýndy aýrýlarǵa arnalǵan dári-dármek shyǵaratyn kásiporyn da bar.
Halyqaralyq atom energııasy agenttigi soqqylar Irannyń Hondab, Iezd jáne Býsherdegi ıadrolyq nysandaryna da áser etkenin rastady. Bul óz kezeginde radıatsııalyq qaýip týdyrýy múmkin.
Mıssııa AQSh-tyń joǵary laýazymdy tulǵalarynyń keıbir málimdemelerin de synǵa alyp, olardy zorlyq-zombylyqty aqtaýy múmkin rıtorıka retinde baǵalady. Halyqaralyq gýmanıtarlyq quqyq azamattyq halyqty qorqytý maqsatynda kúsh qoldanýǵa tyıym salatyny atap ótildi.
Sonymen qatar, mıssııa Iran ishindegi adam quqyqtarynyń jaǵdaıyna da alańdaýshylyq bildirdi. Elde ınternetke shekteýler qoıylyp, quqyq qorǵaýshylar men dinı azshylyq ókilderin qosa alǵanda, jappaı ustap alý jalǵasyp jatqany habarlandy. Sońǵy úsh aptada qaýipsizdikke qatysty aıyptar boıynsha 14 ólim jazasy oryndalǵan.
Qamaýǵa alynǵandar arasynda belgili quqyq qorǵaýshy Nasrın Sotýde jáne bahaı dinin ustanýshylar bar.
Mıssııa ýaqytsha bitimdi oń qadam retinde baǵalap, ony turaqty beıbitshilikke bastaıtyn úderistiń negizine aınaldyrý qajet ekenin atap ótti. Sondaı-aq barlyq yqtımal halyqaralyq quqyq buzýshylyqtaryn táýelsiz ári ashyq tergeýge shaqyrdy.
Aıta keteıik, Iran delegatsııasy AQSh-pen kelissózder júrgizý úshin Pákistanǵa bardy.
