AQSh pen Izraıldiń Iranǵa qarsy soǵysynda qansha adam qaza tapty
ASTANA. KAZINFORM — 28 aqpan-9 naýryz kúnderi aralyǵynda AQSh pen Izraıldiń Iranǵa jasaǵan shabýyly saldarynan Taıaý Shyǵysta júzdegen adam qaza tapty. Reuters agenttigi qaza tapqandar sanyna qatysty táýelsiz zertteýlerge negizdelgen málimetterdi jarııalady.
Qaqtyǵys aýmaǵyna Parsy shyǵanaǵy elderi de kirip ketti. Bul elderde amerıkalyq áskerı bazalar ornalasqan jáne AQSh áskerı qyzmetkerleri bar. Sonymen qatar qaqtyǵysqa Lıvan da aralasty.
Tómende Reuters agenttigi soǵys bastalǵannan keıin bir aptadan astam ýaqyt ótken soń, 9 naýryzdaǵy jaǵdaı boıynsha elder usynǵan qaza tapqandar týraly málimetter keltirilgen.
Iran
«Iran Qyzyl Jarty Aı» gýmanıtarlyq uıymynyń málimetinshe, soǵystyń alǵashqy kúni eldiń ońtústigindegi Mınab qalasyndaǵy bastaýysh mektepke jasalǵan zymyran soqqysy saldarynan keminde 1230 adam qaza tapqan. Olardyń ishinde 175 mektep oqýshysy men mektep qyzmetkerleri bar. Bul kórsetkishke Islam revolıýtsııasy saqshylar korpýsynyń áskerı qyzmetkerleri kirgen-kirmegeni belgisiz.
Iran armııasy ótken aptada AQSh sýasty qaıyǵy Shrı-Lanka jaǵalaýynda ırandyq áskerı kemeni sýǵa batyrǵannan keıin keminde 104 adamnyń qaza tapqanyn habarlady. Bul derekter Qyzyl Jarty Aı uıymynyń jalpy esebine engizilmegen.
Izraıl
Izraıl áskerıleri Lıvannyń ońtústiginde eki sarbazdyń qaza tapqanyn málimdedi. Bul «Hezbolla» qozǵalysy Irandy qoldaý maqsatynda Izraılge shabýyl jasaǵannan keıin qaıta bastalǵan qaqtyǵystardan bergi alǵashqy áskerı shyǵyndar.
Izraıldiń jedel medıtsınalyq qyzmeti «Magen Davıd Adomnyń» málimetinshe, 11 beıbit turǵyn qaza tapqan. Onyń ishinde 1 naýryz kúni Iran zymyrany Ierýsalım mańyndaǵy Beıt-Shemesh qalasyna túsken kezde 9 adam kóz jumǵan.
AQSh
Amerıkalyq áskerı qolbasshylyqtyń málimetinshe, Iranǵa qarsy operatsııalar barysynda 7 áskerı qyzmetker qaza tapqan.
Lıvan
Lıvan densaýlyq saqtaý mınıstrliginiń deregine sáıkes, Izraıldiń áýe soqqylary saldarynan keminde 394 adam qaza tapqan. Olardyń ishinde 83 bala bar.
Saýd Arabııasy
Er-Rııadtyń ońtústik-shyǵysynda ornalasqan Ál-Hardj qalasyndaǵy turǵyn aýdanǵa snarıad túsýi saldarynan eki adam qaza tapqan.
Bahreın
Bahreın ishki ister mınıstrliginiń málimetinshe, 2 naýryz kúni Salman ındýstrııalyq qalasynda zymyrandy tosyp alý kezinde shyqqan órt saldarynan bir adam qaza tapqan.
Kýveıt
Kýveıttiń densaýlyq saqtaý jáne syrtqy ister mınıstrlikteri Irannyń shabýyldary saldarynan bir balanyń qaza tapqanyn habarlady. Sonymen qatar qyzmettik mindetin atqarý kezinde ishki ister mınıstrliginiń eki qyzmetkeri men armııanyń eki áskerı qyzmetkeri qaza tapqan.
Oman
Maskat jaǵalaýynda Marshall araldarynyń týy astynda júrgen MKD VYOM munaı ónimderin tasymaldaıtyn tankerge snarıad tıip, bir adam qaza tapqan.
Birikken Arab Ámirlikteri
BAÁ qorǵanys mınıstrliginiń málimetinshe, elde tórt adam qaza tapqan.
Sırııa
Sırııanyń memlekettik SANA aqparat agenttiginiń habarlaýynsha, 28 aqpanda Iran zymyrany eldiń ońtústigindegi Sýveıda qalasyndaǵy ǵımaratqa túsýi saldarynan tórt adam qaza tapqan.
Irak
Irak polıtsııasy men densaýlyq saqtaý organdarynyń málimetine sáıkes, keminde 15 adam qaza tapqan. Sonymen qatar 5 naýryz kúni Iran qoldaıtyn qarýly toptardy biriktiretin «Islamdyq qarsylasý» uıymynyń bir komandıri onyń kóligine jasalǵan áýe soqqysy kezinde qaza tapqan.
Eske sala ketsek, AQSh prezıdenti Donald Tramp Iranmen soǵys jospardan erte aıaqtalýǵa jaqyn ekenin málimdedi.
