AQSh pen Izraıl Kongress saılaýynan keıin Iranǵa soqqy berýdi josparlap otyr — BAQ
ASTANA. KAZINFORM — Aımaqtaǵy shıelenis órship turǵan tusta Vashıngton men Tel-Avıv Iranǵa qarsy aýqymdy áskerı qımyldardy qaıta bastaý máselesin qarastyryp jatyr.
AQSh pen Izraıl qarýly kúshteri Iranǵa qarsy jańa áskerı operatsııanyń josparyn ázirledi. Operatsııa 3 qarashada AQSh Kongresine saılaýdan keıin bastalýy múmkin.
The New York Times basylymynyń AQSh sheneýnikteri men kelissóz barysynan habardar derekkózderge silteme jasap habarlaýynsha, taraptar Iranǵa qarsy qysqa merzimdi, alaıda qarqyndy áýe shabýyldaryn júrgizýge daıyndyqty jandandyra túsken.
Breaking News: The U.S. and Israel have plans for new strikes on Iran after the midterms, according to officials briefed on the discussions. https://t.co/b2giOKcNtU
— The New York Times (@nytimes) October 21, 2026
Basylymnyń málimetinshe, áskerı operatsııa shamamen úsh kúnge sozylýy múmkin. Negizgi nysanalar qatarynda Irannyń ıadrolyq nysandary, energetıkalyq ınfraqurylymy, ballıstıkalyq zymyrandary men dron qoımalary bar.
Sondaı-aq «Kırka taýy» (Pickaxe Mountain) dep atalatyn, jer astynda tereń ornalasqan ıadrolyq nysanǵa soqqy berý múmkindigi de qarastyrylyp jatyr.
AQSh pen Izraıl áskerı kúshteri Iranǵa soqqy berý kezinde qajetti manevrlerdi pysyqtaý úshin Irak aýmaǵynan ushýdy qosa alǵanda, birlesken jattyǵýlaryn kúsheıtti. Amerıkalyq basylym derekkózderiniń pikirinshe, jańa aýqymdy áskerı operatsııa Iran ekonomıkasyna eleýli zııan keltirip, Tegerandy dıplomatııalyq kelisimderge barýǵa májbúr etýi múmkin.
Áskerı qımyldardy qaıta bastaýǵa ázirlik kezinde AQSh qorǵanys mınıstri Pıt Hegset osy aptada Izraılge baryp, premer-mınıstr Bınıamın Netanıahýmen jaǵdaıdy talqylady. Kezdesý 19 qazanda Negev shólindegi Ývda áýe bazasynda ótti.
AQSh prezıdenti Donald Tramp Iranǵa qarsy áskerı operatsııa ótkizý týraly túpkilikti sheshim qabyldaǵan joq. The New York Times basylymynyń málimetinshe, ol qazan aıynyń sońyna deıin soqqy jasaýǵa ruqsat berýi múmkin. Sonymen qatar áskerı operatsııadan múlde bas tartýy da ǵajap emes.
Operatsııaǵa daıyndyq týraly aqparat taraǵan tusta Tramp Vashıngtonnyń Iranmen qazirgi ýaqytta kelissóz júrgizbeıtinin málimdep, aldaǵy oqıǵalardyń jaqyn arada órbýi múmkin ekenin eskertti.
— Qazirgi ýaqytta Iranmen kelissóz júrgizilip jatqan joq. Qalaı bolǵanda da, jaqyn arada bir jaǵdaı bolady. Kópshilik bul oqıǵa saılaýdan keıin oryn alady dep oılaıtyn sııaqty, — dedi Donald Tramp Endrıýs áýe bazasynda prezıdenttik ushaqqa miner aldynda jýrnalısterge.
President Trump tonight tells me the U.S. is not negotiating with Iran and something will happen “fairly soon.” @NewsNation https://t.co/AYZGTlnpLy
— Libbey Dean (@LibbeyDean_) October 22, 2026
AQSh prezıdentiniń bul málimdemesi Izraılmen jańa áskerı josparlar kelisilgeni týraly aqparat taraǵannan keıin jasaldy.
Buǵan deıin, 8 qazanda Donald Tramp AQSh pen Tegeran arasyndaǵy kelissózderdiń nátıjeli júrip jatqanyn málimdep, 3 qarashada ótetin aralyq saılaýǵa deıin Iranǵa soqqy jasalmaıtynyn aıtqan edi.
Sonymen qatar Vashıngton Pákistan arqyly Tegeranǵa ıadrolyq baǵdarlamaǵa qatysty talaptardy oryndamaǵan jaǵdaıda aýqymdy soqqylar jasalýy múmkin ekenin eskertken. Lıvannyń Al-Akhbar basylymynyń málimetinshe, bul eskertýdi Iran basshylyǵyna Pákistan armııasynyń qolbasshysy, feldmarshal Asım Mýnır jetkizgen.
Basylymnyń habarlaýynsha, Vashıngton men Tegeran daýly máselelerdi sheshý tártibi men kezeńderi jóninde ortaq mámilege kele almaı otyr.
AQSh Irannyń ıadrolyq baǵdarlamasyna qatysty kelisimge aldymen qol jetkizýdi talap etse, Tegeran áskerı áreketterdi toqtatýdy jáne Ormýz buǵazy arqyly keme qatynasyna qatysty máselelerdi sheshýdi alǵa tartyp otyr.
Buǵan deıin Iran AQSh pen Izraıldiń jańa soqqylaryna keń aýqymdy jaýap qaıtarýy múmkin ekenin eskertken. Mundaı jaýap tsıfrlyq ınfraqurylym nysandary men sýasty baılanys kabelderine soqqy berýdi de qamtýy múmkin.
Eske sala keteıik, AQSh Taıaý Shyǵys bazalaryndaǵy áskerin azaıtyp jatqanyn habarlaǵan edik.
