AQSh pen Izraıl qaıtadan Irannyń munaı-hımııa nysandaryna soqqy jasady
ASTANA.KAZINFORM - AQSh pen Izraıl Irannyń ońtústigindegi Assalýıe aýdanyndaǵy munaı óńdeý zaýytyna soqqy berdi. Sondaı-aq Mahshehr qalasyndaǵy arnaıy munaı-hımııa ónerkásip aımaǵyna jáne Mervdeshttegi munaı-hımııa keshenine shabýyl jasalǵany habarlandy.
Irannyń memlekettik Fars agenttiginiń málimetinshe, 6 sáýir, dúısenbi kúni Izraıl men AQSh Islam Respýblıkasynyń gaz nysandaryna, sonyń ishinde Parsy shyǵanaǵyndaǵy obektilerge kezekti ret shabýyl jasaǵan.
Agenttik deregine sáıkes, jarylystar Assalýıedegi ónerkásiptik aımaqta ornalasqan munaı óńdeý zaýyty mańynda tirkelgen. Bul aımaq Irannyń gaz ónerkásibiniń negizgi ortalyǵy sanalady.
Osy kúni Izraıldiń qorǵanys mınıstri Israel Kats el áskeri Irandaǵy eń iri munaı-hımııa keshenderiniń birine qýatty soqqy jasaǵanyn málimdedi.
Onyń aıtýynsha, Assalýıe qalasynda ornalasqan bul nysan Irannyń jalpy munaı-hımııa óniminiń shamamen 50 paıyzyn óndiredi.
«Ońtústik Pars» ken ornyna soqqylar
Irannyń shetelge habar taratatyn Press TV telearnasy Izraıl soqqylary «Ońtústik Pars» gaz ken ornyna jaqyn ornalasqan Damavand jáne Jam kompanııalarynyń nysandaryna baǵyttalǵanyn habarlady. Iran men Qatar birlesip ıgerip jatqan bul ken orny álemdegi eń iri gaz ken oryndarynyń biri sanalady jáne eldegi gaz jetkiziliminiń shamamen 70 paıyzyn qamtamasyz etedi.
Buǵan deıin Izraıl naýryz aıynyń ortasynda da «Ońtústik Pars» ken ornyna soqqy jasaǵan bolatyn.
Al Al Jazeera 4 sáýir kúni Izraıl men AQSh áskerı-áýe kúshteri Hýzestan provıntsııasyndaǵy Mahshehr qalasyndaǵy arnaıy munaı-hımııa aımaǵyna shabýyl jasaǵanyn habarlaǵan.
AFP agenttiginiń málimetinshe, sol shabýyl saldarynan bes adam qaza tapqan.
Israel Kats 6 sáýirdegi málimdemesinde osy ýaqytta Irannyń munaı-hımııa ónimderi eksportynyń shamamen 85 paıyzyn qamtamasyz etetin eki nysan isten shyǵarylyp, jumys istemeı turǵanyn aıtqan.
Sonymen qatar, Reuters agenttigi 6 sáýir kúni AQSh pen Izraıl Irannyń Fars provıntsııasyndaǵy Mervdesht qalasyndaǵy munaı-hımııa keshenine de soqqy jasaǵanyn habarlady. Irannyń memlekettik buqaralyq aqparat quraldary jergilikti bılikke silteme jasap, shabýyldan keıin shyqqan órttiń aýyzdyqtalǵanyn jáne aıtarlyqtaı shyǵyn týraly málimet joq ekenin málimdedi.
Osyǵan deıin Iran AQSh pen Izraıl nysandaryna jańa soqqylar jasaǵanyn málimdegen bolatyn.
