AQSh pen Izraıl Irannyń energetıkalyq nysandaryna soqqy berýi múmkin – CBS

Telearnanyń málimetinshe, josparlanǵan soqqylardyń AQSh pen álemdik ekonomıkaǵa yqtımal áserine baılanysty operatsııany dúısenbi kúni qarjy naryqtary ashylǵanǵa deıin aıaqtaý máselesi talqylanǵan. Alaıda onyń naqty aıaqtalý merzimi áli bekitilmegen.

Birneshe amerıkalyq derekkózdiń aıtýynsha, Izraıl bul jospardan habardar jáne AQSh-pen is-qımyldy úılestirip otyr. Sonymen birge AQSh prezıdenti Donald Tramp soqqy berý týraly túpkilikti buıryqqa áli qol qoıǵan joq.

Eger birlesken operatsııa júzege assa, bul AQSh-tyń araǵaıyndyǵymen jasalǵan ýaqytsha bitimnen keıin Izraıldiń áskerı is-qımyldarǵa qaıta oralýyn bildiredi. Iran shildeniń basynda kelisim kúshin joıyp, AQSh áskerı operatsııalardy qaıta bastaǵannan beri Izraıl aýmaǵyna soqqy jasaǵan joq.

Alaıda Izraıldiń bir joǵary laýazymdy ókili CBS News-ke Izraıldiń tolyq aýqymdy áskerı operatsııalardy qaıta bastaý týraly sheshimnen habarsyz ekenin jáne Iranǵa qarsy qandaı da bir áskerı is-qımylǵa qatysý týraly ótinish almaǵanyn aıtty.

Derekkózderdiń málimetinshe, áskerı operatsııa jospary juma kúni Kemp-Devıdte ótken prezıdent Tramptyń mınıstrler kabıneti otyrysynda talqylanǵan. Aq úıdiń ishki saıasatqa jaýapty keıbir keńesshileri bul josparǵa úzildi-kesildi qarsy bolǵan.

Jýrnalısterdiń qatysýymen ótken jıynda Donald Tramp:

– Biz olarǵa óte aýyr soqqy jasaımyz. Bir sátte olar «budan ári shydaı almaımyz» deıtin jaǵdaıǵa jetedi, – dedi.

Dıplomatııalyq kelissózderdi qaıta jandandyrý múmkindigi týraly suraqqa Tramp:

– Biz tek jeńiske jetýdi qalaımyz, – dep jaýap berdi.

Eki derekkózdiń aıtýynsha, yqtımal shabýyldyń negizgi nysandary elektr stantsııalary, munaı óńdeý zaýyttary jáne basqa da energetıkalyq ınfraqurylym obektileri bolýy múmkin.

Aq úıdiń baspasóz hatshysy Kerolaın Lıvıtt CBS News-ke joldaǵan málimdemesinde:

– Prezıdent Tramp mınıstrler kabıneti otyrysynda aıtqandaı, Amerıka Qurama Shtattary jeńiske jetedi jáne onyń prezıdenttigi kezinde Irannyń ıadrolyq qarýǵa ıe bolýyna jol berilmeıdi, – dedi.

Pentagonnyń baspasóz hatshysy Shon Parnell prezıdent túpkilikti sheshim qabyldaǵanǵa deıin yqtımal nysandarǵa qatysty túsinikteme berilmeıtinin aıtty.

– Qorǵanys mınıstrligi prezıdenttiń kez kelgen tapsyrmasyn bir sátte oryndaýǵa tolyq daıyn, – dedi ol.

CBS News-ke pikir bildirgen AQSh-tyń burynǵy áskerı sheneýnikteriniń biri energetıkalyq ınfraqurylymǵa soqqy jasaýdyń maqsaty Iran armııasynyń qyzmet kórsetý múmkindigin shektep, memlekettik basqarý júıesine qysym kórsetý ekenin aıtty.

Izraıldiń joǵary laýazymdy ókiliniń aıtýynsha, osy aptada Vashıngtonda ótken kezdesýde premer-mınıstr Bınıamın Netanıahý prezıdent Trampqa áskerı is-qımyldyń úsh yqtımal nusqasyn tanystyrǵan. Onyń biri qurlyqtaǵy áskerı jabdyqtaý baǵyttaryna soqqy berýdi kózdeıdi. Netanıahý sondaı-aq AQSh qorǵanys mınıstri Pıt Hegsetpen de kezdesti.

Amerıkalyq sheneýniktiń aıtýynsha, osy qaqtyǵys barysynda AQSh áskeri áskerı maqsatta da, azamattyq maqsatta da paıdalanylǵan birneshe kópirge soqqy jasaǵan.

Juma kúni AQSh-ta Tegerandy elektr energııasynan ajyratý múmkindigi de joǵary deńgeıde talqylanǵanymen, túpkilikti sheshim qabyldanbaǵan.

Ótken aptada Donald Tramp Truth Social áleýmettik jelisinde Ormýz buǵazyndaǵy kez kelgen keme shabýylyna jaýap retinde Irandaǵy kópir nemese elektr stantsııasy bombalanatynyn málimdedi.

Sondaı-aq ol ózine Iran qastandyq jasasa, tutas eldi joıyp jiberetinin de málimdegen-di.