AQSh pen Iranǵa qaqtyǵysty toqtatý jospary usynyldy

AQSh pen Iranǵa áskerı is-qımyldardy toqtatýǵa arnalǵan aralyq jospar usynyldy. Qujatqa sáıkes, aldymen dereý atysty toqtatý kózdelip, keıin 15–20 kún ishinde jan-jaqty kelisim boıynsha kelissózder bastalýy tıis. Bul týraly Reuters habarlady.

Bastama Pákistannyń araǵaıyndyǵymen ázirlengen. Ol úshin dúısenbige qaraǵan túni Pákistan armııasynyń bas shtabynyń bastyǵy Asım Mýnır, AQSh vıtse-prezıdenti Djeı Dı Vens, AQSh-tyń arnaıy ókili Stıv Ýıtkoff jáne Iran syrtqy ister mınıstri Abbas Aragchı arasynda qarqyndy baılanystar júrgizilgen.

Agenttik dereginshe, birinshi kezeńde atysty toqtatý týraly kelisim jasalyp, odan keıin taraptar 15–20 kún ishinde uzaq merzimdi retteý joldaryn talqylaýǵa kóshedi.

Buǵan deıin Axios AQSh, Iran jáne óńirlik deldaldar eki kezeńnen turatyn kelisim aıasynda 45 kúnge deıin sozylatyn keńeıtilgen bitim múmkindigin de qarastyryp jatqanyn habarlaǵan. Bul bastama soǵysty tolyq toqtatýǵa alyp kelýi múmkin.

Sonymen qatar Tegeran ýaqytsha bitim aıasynda Ormýz buǵazyn ashýǵa kelispeıtinin jáne sheshim qabyldaýǵa qatysty ýltımatýmdardy qabyldamaıtynyn málimdedi. Iran tarapy AQSh-tyń turaqty atysty toqtatýǵa daıyn ekenin kórsetpeı otyrǵanyn da atap ótti.

Dúısenbi kúni Tegeranda bılik ókilderi usynylǵan sharttarǵa qatysty óz talaptary men ustanymdaryn qalyptastyrǵanyn habarlady.

Iran Syrtqy ister mınıstrliginiń ókili Esmaıl Bagaı kelissózder ýltımatýmdar men qysym jaǵdaıynda júrgizilmeıtinin aıtty.

Onyń sózinshe, AQSh buǵan deıin usynǵan talaptar shamadan tys bolǵandyqtan qabyldanbaǵan.

AQSh prezıdenti Donald Tramp buǵan deıin Tegeran 48 saǵat ishinde kelisimge kelýi tıis ekenin málimdegen.

Onyń aıtýynsha, bul merzim saqtalmaǵan jaǵdaıda Vashıngton Irannyń energetıkalyq jáne kólik ınfraqurylymyna soqqylardy kúsheıtýge daıyn.

Iran Tramptyń jańa ýltımatýmynan bas tartty.