AQSh pen Iran Jenevada kelissózderdiń jańa kezeńin ótkizedi
ASTANA. KAZINFORM — Erteń, 17 aqpan kúni Jenevada Iran men AQSh arasynda Irannyń ıadrolyq qujatyna qatysty janama kelissózder ótedi.
Bul týraly Iran Syrtqy ister mınıstrligi habarlady.
— Iran men AQSh arasyndaǵy janama ıadrolyq kelissózder seısenbi kúni Oman Syrtqy ister mınıstriniń qatysýymen ótedi, — delingen Telegram-kanalda jarııalanǵan málimdemede.
Amerıkalyq delegatsııa quramynda AQSh prezıdenti Donald Tramptyń Taıaý Shyǵystaǵy arnaıy ókili Stıv Ýıtkoff pen kásipker Djared Kýshner bolady dep josparlanǵan.
Iran delegatsııasyn Syrtqy ister mınıstri Abbas Arakchı basqarady. Derekkózderdiń habarlaýynsha, Oman Syrtqy ister mınıstri Bedr bın Hamed al-Býsaıdı kelissózderge deldal retinde qatysady.
Esterińizge sala keteıik, AQSh pen Iran ókilderi arasyndaǵy kelissózderdiń birinshi kezeńi Oman astanasy Maskatta ótken bolatyn. IRNA agenttiginiń habarlaýynsha, aımaqtyq qaýipsizdik, zymyrandyq baǵdarlamalar jáne basqa da taqyryptar talqylanbaǵan.
Oman Syrtqy ister mınıstri kelissóz eki jaqtyń da ustanymyn naqtylaýǵa jáne odan ári ilgerileýdiń yqtımal baǵyttaryn anyqtaýǵa múmkindik bergenin habarlady.
Aıta keteıik, byltyr maýsym aıynda Iran Izraılmen atysty toqtatý rejımi kúshine engenin málimdedi. Alaıda eki el arasynda atysty toqtatý rejımi buzylyp, Tel-Avıv Tegerandy zymyran atty dep aıyptady. Al Iran bul málimdemelerdi joqqa shyǵardy.