AQSh pen Iran ýran baıytý deńgeıin tómendetý jóninde kelisýi múmkin – BAQ
ASTANA. KAZINFORM – Vashıngton men Tegeran Irandaǵy ýran baıytý deńgeıin tómendetý týraly aldyn ala kelisimge kelýi múmkin, dep habarlaıdy TASS agenttigi.
Saýd Arabııasynyń Al Arabiya telearnasy derekkózderine silteme jasap, taraptar Irannyń ıadrolyq baǵdarlamasyna qatysty bolashaq kelisimniń sharttaryn talqylap jatqanyn habarlady.
Telearna suhbattastarynyń aıtýynsha, Vashıngton Iranǵa óz aýmaǵynda ýrandy 3,67 paıyzǵa deıin baıytýǵa ruqsat berýge kelisken. Tegeran da bul shartty qabyldaǵan.
Sonymen qatar AQSh Irannyń 60 paıyzǵa deıin baıytylǵan ýranynyń baıytý deńgeıin tómendetýdi talap etip otyr.
Al Arabiya derekkózderiniń málimetinshe, bul máseleni sheshý úshin taraptar úshinshi eldi tartý múmkindigin de qarastyryp jatyr.
Aldyn ala kelisimge qol jetkizilgeni týraly ázirge resmı aqparat jarııalanǵan joq.
Aıta keteıik, buǵan deıin AQSh prezıdenti Donald Tramp Tegerannyń ıadrolyq baǵdarlamasy men Ormýz buǵazynyń ashylýy jónindegi kelissózderde ilgerileýshilik bolǵan jaǵdaıda, Iranǵa amerıkalyq soqqylardyń qaıta jasalý yqtımaldyǵy óte tómen ekenin málimdegen edi.
Sondaı-aq AQSh Irannyń ıadrolyq baǵdarlamasy týraly aqparat úshin 20 mln dollar usyndy.
