AQSh pen Iran ókilderi bitimdi 60 kúnge uzartý týraly kelisimge keldi — BAQ
ASTANA.KAZINFORM — Amerıkalyq buqaralyq aqparat quraldarynyń habarlaýynsha, Amerıka Qurama Shtattary men Iran kelissóz júrgizýshileri bitimdi 60 kúnge uzartý jáne Irannyń ıadrolyq baǵdarlamasy boıynsha kelissózderdi bastaý jóninde ortaq mámilege kelgen. Alaıda qujat áli Donald Tramptyń túpkilikti maquldaýyn kútip otyr, dep Anadoly agenttigi jazdy.
Bul týraly amerıkalyq Axios platformasy AQSh-tyń eki sheneýnigine silteme jasap habarlady.
Basylym málimetinshe, amerıkalyq jáne ırandyq kelissóz júrgizýshileri 60 kúndik bitimdi uzartý jáne Irannyń ıadrolyq baǵdarlamasyna qatysty kelissózderdi bastaý jónindegi kelisim mátinin kelisken. Degenmen prezıdent Donald Tramp ázirge qujatqa sońǵy kelisimin bermegen.
AQSh sheneýnikteriniń aıtýynsha, kelisim mátini seısenbi kúni maquldanǵan, al eki eldiń basshylyǵy kelissóz barysyn talqylaǵan.
Sondaı-aq amerıkalyq tarap Iran keıinnen «kelisimge qol qoıýǵa daıyn ekenin» jetkizdi dep málimdegen. Alaıda bul aqparatty Iran resmı túrde rastaǵan joq.
Eger kelisimge qol qoıylsa, Ormýz buǵazy arqyly saýda kemeleriniń eshqandaı shekteýsiz júrýine múmkindik beriledi.
Óz kezeginde AQSh Iran porttaryna engizilgen teńiz blokadasyn alyp tastaýy múmkin.
Ázirge AQSh ákimshiligi bul aqparatqa qatysty resmı málimdeme jasaǵan joq.
Buǵan deıin Iran Omanmen Ormýz buǵazyn basqarýdyń jańa tásili jóninde kelissóz júrgizip jatqanyn jazǵan edik.
