AQSh pen Iran kelissózinde qandaı máseleler talqylanatyny belgili boldy
ASTANA. KAZINFORM – Qatar astanasy Dohada ótetin AQSh pen Iran delegatsııalary arasyndaǵy janama kelissózderdiń negizgi taqyryptary Ormýz buǵazyndaǵy jaǵdaı men Irannyń ıadrolyq baǵdarlamasy bolmaq. Bul týraly reseılik TASS habarlady.
Muny Qatar Syrtqy ister mınıstrliginiń resmı ókili Májıd ben Muhammed ál-Ansarı málimdedi.
-Ormýz buǵazyndaǵy jaǵdaı, árıne, kelissózderdiń negizgi taqyryptarynyń biri. Alaıda bul jalǵyz másele emes. Budan bólek, Irannyń ıadrolyq baǵdarlamasy men óńirdegi jalpy ahýal da talqylanady, – dedi dıplomat brıfıngte.
Ál-Ansarıdiń aıtýynsha, Dohanyń ustanymy ózgergen joq. Qatar Ormýz buǵazynyń halyqaralyq mártebesine sáıkes onda keme qatynasynyń esh kedergisiz júrýin qoldaıdy.
Sondaı-aq ol AQSh prezıdentiniń arnaıy ókili Stıv Ýıtkoff pen kásipker Djared Kýshnerdiń Qatarǵa deldaldarmen kezdesý úshin kelgenin aıtty. Kezdesý barysynda óńirlik máseleler, onyń ishinde Iranmen kelissózder men Lıvandaǵy jaǵdaı talqylanady.
-AQSh prezıdentiniń arnaıy ókili Stıv Ýıtkoff pen Djared Kýshnerdiń Dohaǵa sapary óńirdegi túrli máselelerdi talqylaý úshin deldaldarmen kezdesýler aıasynda uıymdastyryldy. Onyń qatarynda Iranmen kelissózder, Lıvandaǵy jaǵdaı jáne basqa da máseleler bar, – dedi ol.
Dıplomattyń aıtýynsha, ázirge AQSh pen Iran delegatsııalary arasynda joǵary deńgeıdegi tikeleı kezdesý josparlanbaǵan.
-Mendegi aqparatqa sáıkes, eki tarap arasynda joǵary deńgeıdegi kezdesý ótpeıdi. Aldaǵy kúnderi de tikeleı baılanys bolady dep kútilmeıdi, – dedi ál-Ansarı.
Ol joǵary deńgeıdegi kezdesýler tehnıkalyq deńgeıdegi kelissózder naqty nátıje bergen jaǵdaıda ǵana uıymdastyrylýy múmkin ekenin atap ótti.
-Joǵary deńgeıdegi kezdesýler tehnıkalyq konsýltatsııalar nátıje bergen jaǵdaıda ǵana ótedi, – dedi Qatar SІM ókili.
Sonymen qatar ál-Ansarı qazirgi ýaqytta Dohaǵa Irannyń joǵary laýazymdy ókilderiniń kelýi kútilmeıtinin málimdedi.
Osyǵan deıin Qatardyń Irannyń 6 mlrd dollar kólemindegi aktıvin qaıtaratyny týraly jazdyq.
