AQSh pen Iran kelissózderinde ilgerileýshilik baıqaldy
ASTANA. KAZINFORM – Qatardyń Al-Araby Al-Jadeed basylymy AQSh pen Iran arasyndaǵy kelissózderde aıtarlyqtaı ilgerileýshilikke qol jetkizilgenin habarlady. Basylymnyń málimetinshe, Iran delegatsııasy kelissózderge qatysý úshin Dohaǵa barǵan, dep habarlaıdy Anadolu agenttigi.
Qatar astanasyna amerıkalyq delegatsııa da kelip, Iran ókilderimen tikeleı kelissózder júrgizedi dep kútilip otyr. Bul týraly kelissózder barysynan habardar derekkózderge silteme jasaǵan Al-Araby Al-Jadeed jazdy.
Basylymnyń derekkózderi Vashıngton men Tegeran arasyndaǵy janama kelissózderde eleýli ilgerileýshilik bolǵanyn aıtady.
Taraptar Irannyń ıadrolyq baǵdarlamasy, Ormýz buǵazy arqyly keme qatynasynyń erkindigi jáne Iranǵa qarjylyq yntalandyrý sharalaryn usyný máseleleri boıynsha bastapqy qadamdardy kelisken.
Gazettiń habarlaýynsha, Katar delegatsııasy Tegeranda 12 saǵattan astam ýaqyt kelissóz júrgizgennen keıin Iran delegatsııasy Dohaǵa barǵan. Endi amerıkalyq taraptyń da qosylýy kútilip otyr.
Basylym yqtımal kelisimniń kepili retinde Qytaı men Reseıdiń qatysýy múmkin ekenin de joqqa shyǵarmaıdy. Alaıda AQSh delegatsııasynyń quramy ázirge jarııalanǵan joq.
Eske sala ketsek, buǵan deıin Katar deldaldary AQSh pen Iran arasyndaǵy dıplomatııalyq baılanystar aıasynda Tegeranda kelissózder ótkizgen edi.
Al jýyrda ǵana Iran Ormýz buǵazynda AQSh-tyń barlaý dronyn qolǵa túsirgenin málimdedi.
Sondaı-aq 24 qazan kúni Tramp Iranǵa qarsy jańa áskerı operatsııa júrgizýi múmkin ekenin eskertti.
