AQSh pen Iran arasyndaǵy kelissózderdiń alǵashqy kezeńi 11 sáýirde ótedi – Aq úı

ASTANA. KAZINFORM – AQSh pen Iran arasyndaǵy kelissózderdiń alǵashqy kezeńi 11 sáýir, senbi kúni ótedi. Bul týraly Aq úı málimdedi, dep habarlaıdy BBC.

Aq úıdiń málimetinshe, kelissózderde AQSh atynan vıtse-prezıdent Djeı Dı Vens qatysady.

Buǵan deıin Pákistan premer-mınıstri kelissózder 10 sáýir, juma kúni Islamabadta bastalady dep kútilip otyrǵanyn aıtqan edi.

Aq úıdiń baspasóz hatshysy Kerolaın Levıtt Vashıngton AQSh pen Iran arasyndaǵy eki aptalyq bitim kelisimine Lıvan kirmeıtinin rastady. Onyń aıtýynsha, Izraıl 8 sáýir, sársenbi kúni soǵys bastalǵaly bergi Lıvanǵa jasalǵan eń aýqymdy soqqyny júzege asyrǵan.

Sondaı-aq Aq úı ókili AQSh prezıdenti Donald Tramp Irandy bitim kelisimine sáıkes Ormýz buǵazyn ashýǵa májbúrleıtinin málimdedi.

Reuters agenttiginiń jazýynsha, Iran bastapqyda AQSh qabyldamaǵan usynys jasaǵanymen, keıin Taıaý Shyǵystaǵy soǵysty toqtatýǵa qatysty neǵurlym tıimdi jospar usynǵan.

Kerolaın Levıtttiń aıtýynsha, Tegeran baıytylǵan ýrandy berýge kelisýi múmkin. Ol sondaı-aq bitim jarııalanar aldynda Donald Tramp Izraıl premer-mınıstri Bınıamın Netanıahýmen telefon arqyly sóıleskenin jetkizdi.

Buǵan deıin Tegeran Izraıldiń Lıvandaǵy «Hezbolla» uıymyna qarsy aýqymdy soqqysynan keıin, onda 100-den astam adam qaza tapqanyna, Vashıngtonmen jasalǵan kelisimge qaramastan Ormýz buǵazyn qaıta japqany habarlanǵan edi.

Eske salaıyq, 8 sáýirge qaraǵan túni AQSh pen Iran eki aptalyq bitimge keldi. Kelisimge Izraıl de qosyldy, alaıda Lıvandy qamtymaıdy. Bul elde Izraıl Irandy qoldaıtyn «Hezbolla» uıymyna qarsy áskerı áreketterin jalǵastyryp jatyr.