AQSh pen Iran arasyndaǵy kelissózder Shveıtsarııada bastalady
ASTANA. KAZINFORM — AQSh pen Iran arasyndaǵy tikeleı kelissózder 21 maýsym, jeksenbi kúni Shveıtsarııada bastalýy tıis dep habarlaıdy VVS.
20 maýsymda Tegeran Izraıldiń Lıvannyń ońtústigine jasaǵan soqqylaryna jaýap retinde Ormýz buǵazy qaıta jabylǵanyn málimdedi. Iran bıligi bul áreketti AQSh pen Iran prezıdentteri qol qoıǵan ózara túsinistik týraly memorandýmnyń buzylýy dep atady. Alaıda amerıkalyq áskerı qurylymdar bul málimdemeni joqqa shyǵaryp, buǵaz arqyly kemeler qozǵalysy jalǵasyp jatqanyn habarlady.
Senbi kúni keshke AQSh vıtse-prezıdenti Djeı Dı Vens Vashıngtonnan ushyp shyǵyp, jeksenbi tańerteń Shveıtsarııaǵa jetti. Al Iran delegatsııasy, onyń quramynda parlament spıkeri Muhammed-Bager Ǵalıbaf pen syrtqy ister mınıstri Abbas Arakchı bar, ol elge bir kún buryn kelgen.
Irandyq buqaralyq aqparat quraldarynyń málimetinshe, delegatsııa quramynda qaýipsizdik qyzmetteriniń, ortalyq banktiń jáne munaı salasynyń joǵary laýazymdy ókilderi de bar. AQSh delegatsııasynyń quramyna Djeı Dı Vensten bólek prezıdenttiń arnaıy ókilderi Stıv Ýıtkoff pen Djared Kýshner kirdi.
Kelissózderdiń jańa kezeńi jeksenbi kúni bastalmaq. Vıtse-prezıdent Djeı Dı Vens sapar aldynda ıadrolyq baǵdarlama jáne Lıvandaǵy atysty toqtatý máseleleri boıynsha ilgerileýge qol jetkizýge úmittenetinin aıtty.
— ıAdrolyq másele boıynsha da, Lıvandaǵy atysty toqtatý jóninde de alǵa jyljımyz dep senemin, — dedi ol Merılend shtatyndaǵy Endrıýs áskerı bazasynda ushaqqa miner aldynda.
Onyń boljamynsha, kelissózderdiń alǵashqy kezeńi birneshe kúnge sozylýy múmkin.
— Biz Izraıl men Lıvannyń qaýipsizdigin turaqty baqylaýda ustaýymyz kerek. Negizgi maqsat — búkil óńirdiń qaýipsizdigin qamtamasyz etý, — dedi AQSh vıtse-prezıdenti.
Óz kezeginde Iran Syrtqy ister mınıstrliginiń resmı ókili Esmaıl Bagaı Tegerannyń kelissózder barysynda qarsy taraptan óz mindettemelerin oryndaýdy talap etetinin málimdedi.
Jumaǵa qaraǵan túni Izraıldiń shabýyldary saldarynan Lıvannyń ońtústiginde keminde 18 adam qaza tapqan. Osyǵan baılanysty 19 maýsymǵa josparlanǵan AQSh pen Iran arasyndaǵy kelissózderdiń keıinge qaldyrylǵany habarlanǵan bolatyn.
Jaǵdaıdan habardar eki derekkózdiń Reuters agenttigine aıtýynsha, AQSh vıtse-prezıdenti Djeı Dı Vens beısenbi kúni kelissózderge qatysý josparyn ýaqytsha toqtatqan.
Kelisimniń turaqtylyǵyna qatysty alańdaýshylyqtyń kúsheıýine baılanysty Pákistan, Saýd Arabııasy jáne Túrkııa sııaqty deldal elderdiń ókilderi jeksenbi kúni Mysyrdyń El-Alameın qalasynda kezdesip, jeke konsýltatsııalar ótkizýdi josparlaǵan.
Buǵan deıin kelissózder men saltanatty rásim Shveıtsarııa Alpisindegi Bıýrgenshtok kýrorttyq kesheninde ótedi dep kútilgen edi.
Eske sala keteıik, 15 maýsymǵa qaraǵan túni Iran, Pákistan jáne AQSh Vashıngton men Tegeran arasyndaǵy beıbit kelisim jóninde ýaǵdalastyqqa qol jetkizilgenin málimdegen bolatyn. Taraptar barlyq baǵyttaǵy, sonyń ishinde Lıvandaǵy áskerı is-qımyldardy dereý jáne tolyq toqtatýǵa kelisken.
