AQSh pen Iran arasyndaǵy kelissózder bastalyp, úzilis jarııalandy
ASTANA. KAZINFORM - Taraptar jańa bastamalardy talqylaýǵa daıyn ekenderin ańǵartqanymen, negizgi máseleler boıynsha áli de naqty qadam jasalmady. Bul týraly Kazinform agenttiginiń Taıaý Shyǵystaǵy menshikti tilshisi habarlady.
Jeneva qalasynda Tegerannyń ıadrolyq baǵdarlamasyna qatysty AQSh pen Iran arasyndaǵy janama kelissózderdiń kezekti kezeńi bastaldy. Kezdesý Oman sultandyǵynyń araǵaıyndyǵymen, Jeneva kóliniń jaǵasyndaǵy omandyq dıplomatııalyq rezıdentsııa aýmaǵynda ótip jatyr.
Irannyń Tasnim agenttigi men memlekettik telearnasynyń málimetinshe, konsýltatsııalar bastalǵannan keıin úsh saǵat ótken soń taraptar keńesý úshin úzilis jarııalaǵan. Halyqaralyq aqparat quraldary amerıkalyq delegatsııa minýi múmkin kortejdiń Oman rezıdentsııasy aýmaǵynan shyǵyp ketkenin habarlady.
Kelissózderge araǵaıyndyq jasap otyrǵan Omannyń syrtqy ister mınıstri Badr ál-Býsaıdı úzilis jasalǵanyn rastady ári kelissózderdiń barysyn oń baǵalady.
— Búgin Jenevada biz kreatıvti ári pozıtıvti ıdeıalarmen almastyq. Qazir amerıkalyq jáne ırandyq delegatsııalar úzilis aldy, kelissózder keıinirek jalǵasady. Budan da ilgerileýge qol jetkizemiz dep úmittenemiz, — dep jazdy ol X áleýmettik jelisindegi paraqshasynda.
We’ve been exchanging creative and positive ideas in Geneva today, and now both US and Iranian negotiators have adjourned for a break. We’ll resume later today. We hope to make more progress.
— Badr Albusaidi - بدر البوسعيدي (@badralbusaidi) February 26, 2026
Onyń aıtýynsha, talqylaýlar nátıjeli ári turaqty kepildik negizinde ádil kelisimge kelý jolyndaǵy shyǵarmashylyq sheshimge ashyq jaǵdaıda ótip jatyr.
Kelissózder qarsańynda Omannyń syrtqy ister mınıstri Badr ál-Býsaıdı AQSh-tyń Taıaý Shyǵys jónindegi arnaıy ókili Stıv Ýıtkoff jáne AQSh prezıdenti Donald Tramptyń kúıeý balasy Djared Kýshnermen jeke kezdesý ótkizdi.
Oman SІM málimetinshe, taraptar Irannyń usynystaryn, sondaı-aq amerıkalyq kelissóz tobynyń saýaldary men ustanymdaryn talqylaǵan.
Iran tarapynan Jenevaǵa syrtqy ister mınıstri Abbas Arakchı keldi. Al Iran Joǵarǵy kóshbasshysynyń keńesshisi Alı Shamhanı kelisimge dereý qol jetkizýge tolyq múmkindik bar ekenin málimdedi. Onyń sózinshe, eger kelissózderdiń ózegi Irannyń ıadrolyq qarý jasamaý máselesimen shektelse, ortaq mámile qol sozym jerde.
— Eger kelissózderdiń basty taqyryby Irannyń ıadrolyq qarý shyǵarmaý bolsa, bul el kóshbasshysynyń pátýasyna da, qorǵanys doktrınasyna da saı keledi. Mundaı jaǵdaıda jedel kelisimge qol jetkizý ábden múmkin, — dedi Shamhanı.
Ol sondaı-aq Abbas Arakchıdiń mámile jasaýǵa jetkilikti ókiletke ıe ekenin atap ótti.
Soǵan qaramastan ýrandy baıytý máselesinde taraptardyń ustanymdary ártúrli bolyp otyr. AQSh prezıdenti Donald Tramp buǵan deıin Irannyń ýran baıytýǵa quqyǵy bolmaýy tıis ekenin málimdegen. Al Tegeran óz kezeginde ıadrolyq baǵdarlamasynyń zańdylyǵyn alǵa tartyp, onyń tek beıbit maqsatqa baǵyttalǵanyn basa aıtady.
Iran Syrtqy ister mınıstrligi amerıkalyq resmı tulǵalardy kelissózge barynsha kóńil bólýge shaqyrdy.
Vedomstvonyń atap ótýinshe, buqaralyq aqparat quraldaryndaǵy qarama-qaıshy málimdemeler, sonyń ishinde AQSh memlekettik hatshysy Marko Rýbıonyń pikiri dıplomatııanyń ilgerileýine negiz bola almaıdy.
Irandyq derekkózder men AFP agenttiginiń habarlaýynsha, Jenevadaǵy konsýltatsııalarǵa Halyqaralyq atom energııasy agenttiginiń bas dırektory Rafael Grossı de qosylǵan. Ol kelissózderge tehnıkalyq baqylaýshy retinde qatysyp jatyr.
📸 | عقد معالي السيد بدر بن حمد البوسعيدي @badralbusaidi وزير الخارجية لقاءً في مدينة جنيف مع معالي رافاييل غروسي المدير العام للوكالة الدولية للطاقة الذرية، وذلك في إطار التشاور وتبادل وجهات النظر حول المسائل الفنية ذات الصلة بالملف النووي الإيراني والأفكار الجديدة التي هي محل… pic.twitter.com/RrjA28bfuU
— وزارة الخارجية (@FMofOman) February 26, 2026
Bul kelissózder Vashıngtonnyń Taıaý Shyǵystaǵy ásker sanyn arttyryp, qysymdy kúsheıtken tusynda máseleni dıplomatııalyq retteýge berilgen sońǵy múmkindikterdiń biri retinde baǵalanyp otyr.
Konsýltatsııalar qaıta jalǵasqannan keıin taraptar yqtımal kelisimniń parametrleri men onyń oryndalýyna beriletin kepildikterdi talqylaýdy jalǵastyrmaq.
Buǵan deıin Iran men AQSh 26 aqpanda Jeneva qalasynda kelissózderdiń úshinshi kezeńin ótkizetini týraly habarlaǵan bolatynbyz.