AQSh pen Iran arasyndaǵy kelisimnen keıin munaı baǵasy tómendedi
ASTANA. KAZINFORM — Munaı baǵasy AQSh prezıdenti Donald Tramptyń Iranmen kelisim týraly jáne Ormýz buǵazynyń ashylýy týraly jarııalaýynan keıin tústi, dep habarlaıdy CNN.
Telernanyń habarlaýynsha, munaı baǵasy Donald Tramp Iranmen kelisim týraly jáne AQSh-tyń elge qarsy áskerı-teńiz blokadasynyń aıaqtalýy týraly jarııalaǵannan keıin tómendedi.
Brent markaly munaı baǵasy 3,9%-ǵa tómendep, barreline shamamen 84 dollardy qurady, al amerıkalyq munaı baǵasy 4,8%-ǵa tómendep, barreline shamamen 81 dollarǵa jetti. Eger munaı osy deńgeıde saqtalsa, bul 2026 jyldyń 4 naýryzynan bergi eń tómen baǵa bolady.
— Juma kúni munaı baǵasy soǵystyń alǵashqy aptasynan beri alǵash ret barreline 90 dollardan tómen tústi. Soǵan qaramastan, baǵa AQSh pen Izraıldiń Iranǵa jasaǵan shabýyldary bastalǵanǵa deıingi, ıaǵnı 70 dollardan tómen deńgeıge áli jete qoıǵan joq, — dep atap ótti basylym.
Bul rette mamandar munaı naryǵynda munaı aǵynyn qalypty jaǵdaıǵa keltirý úshin áli de aıtarlyqtaı jumys atqarylýy kerek ekenin atap ótti. Ol úshin Ormýz buǵazyndaǵy jaǵdaıdy turaqtandyrý, buǵazǵa kirip-shyǵý úshin kedergisiz keme qatynasyn qamtamasyz etý, Taıaý Shyǵysta munaı óndirisin qalpyna keltirý, munaıdyń apattyq qorlaryn tolyqtyrý jáne zaqymdalǵan energetıkalyq nysandardy jóndeý qajet.
Munaı taldaýshylary jalpy alǵanda munaı baǵasy biraz ýaqyt boıy joǵary bolyp qalady dep sanaıdy. Baǵa bastapqyda tómendeýi múmkin bolsa da, suranys qaıtadan ósip, ásirese apattyq qorlar tolyqtyrylǵannan keıin olar qalpyna keledi dep kútilip otyr.
Sarapshylar sonymen qatar Taıaý Shyǵystaǵy munaı uńǵymalarynyń soǵys kezinde negizinen toqtap qalǵanyn jáne qaıta iske qosylǵannan keıin óndiristiń qaıta jandanýy birneshe aptaǵa sozylýy múmkin ekenin atap ótti. Sarapshylar sonymen qatar uńǵymalardyń soǵysqa deıingi óndiris deńgeıine jete almaýy múmkin ekenin eskertti.
Eske salsaq, AQSh prezıdenti Donald Tramp Vashıngton men Tegeran arasyndaǵy soǵys qımyldaryn toqtatý jónindegi kelisimge qol qoıý jeksenbi kúni josparlanǵanyn málimdedi.
Tramptyń jazýynsha, qujatqa qol qoıylǵannan keıin Ormýz buǵazy barlyq tarap úshin ashylady.
Buǵan deıin Iran Syrtqy ister mınıstri Abbas Arakchı AQSh-pen áskerı qaqtyǵysty toqtatý jónindegi kelisim aıaqtalýǵa jaqyn ekenin jáne Ormýz buǵazynyń ashylýyn qamtıtynyn aıtqan.
Sondaı-aq ol Irannyń ıadrolyq baǵdarlamasyna qatysty kelissózder keıinirek bastalatynyn habarlaǵan.
Budan bólek AQSh pen Iran arasyndaǵy kelisim bir táýlik ishinde rásimdelýi múmkin ekeni habarlandy.
