AQSh pen Iran arasyndaǵy beıbit kelisim aıasynda munaı baǵasy tómendedi
ASTANA. KAZINFORM — Munaı baǵasynyń tómendeýi álemdik ınflıatsııa qaýpin azaıtýy múmkin, biraq jaǵdaı áli tolyq turaqtanǵan joq, dep habarlaıdy CNBC.
Tamyz aıyndaǵy jetkizilimge arnalǵan Brent markaly munaı fıýchersteri 1,13%-ǵa tómendep, barreline 78,65 dollardy qurady, al shilde aıyndaǵy WTI kelisimsharttary 1,26%-ǵa tómendep, barreline 75,82 dollar shamasynda boldy.
Halyqaralyq energetıka agenttigi (HEA) qaqtyǵystyń uzaq merzimdi sheshimi kelesi jyly usynystyń aıtarlyqtaı ósýine jáne munaıdyń úlken profıtsıtine ákeledi dep kútedi. Uıym málimeti boıynsha, álemdik usynys 2026 jyly táýligine orta eseppen 3,9 mıllıon barrelge tómendep, 102,4 mıllıonǵa jetedi, al 2027 jyly táýligine 110,3 mıllıon barrelge deıin qalpyna keledi.
New York Life Investment Management esebinde munaı baǵasynyń tómendeýi álemdik ınflıatsııa qaýpin azaıtýy múmkin ekendigi, biraq jaǵdaı áli tolyq turaqtanbaǵany aıtylǵan.
Kompanııa sarapshylary baǵanyń qaqtyǵysqa deıingi deńgeıden joǵary ekenin, keme qatynasyn qalypqa keltirý ýaqytty qajet etetinin, al strategııalyq qorlardy áli de tolyqtyrý qajet ekenin atap ótti.
Buǵan deıin AQSh pen Iran beıbitshilik kelisimge kelgeni habarlanǵan bolatyn. Beıbitshilik kelisimine resmı qol qoıý rásimi 19 maýsymda Shveıtsarııada ótýi múmkin. Eki el arasyndaǵy beıbitshilik kelisimi Ormýz buǵazynyń ashylýyna jáne álemdik naryqta shıkizat jetkiziliminiń artýyna ákelýi yqtımal.
AQSh pen Iran arasyndaǵy atysty toqtatý týraly kelisim BUU-dan qoldaý tapty.
QR Prezıdenti Qasym-Jomart Toqaev ta Vashıngton men Tegeran arasyndaǵy kelisimderdi quptady.
Saıası habarlandyrýlardan keıin munaı baǵasynyń kúrt tómendeýine qaramastan, sarapshylar naryqtaǵy belgisizdik saqtalyp otyrǵanyn atap ótedi.
