AQSh pen Iran arasyndaǵy 14 saǵatqa sozylǵan kelissózder búgin de jalǵasady
ASTANA. KAZINFORM – Islamabadta Pákistan tarapynyń deldaldyǵymen ótken AQSh pen Iran arasyndaǵy kelissózder 14 saǵatqa sozylyp, resmı túrde aıaqtaldy. Taraptar birqatar máseleler boıynsha ortaq ustanymǵa kele almaǵanymen, dıalog 12 sáýirde jalǵasady. Bul týraly AP News agenttigi habarlady.
Iran úkimetiniń málimetinshe, kelissózder 14 saǵattyq talqylaýdan keıin ýaqytsha toqtatylǵan. Qazirgi ýaqytta eki taraptyń tehnıkalyq toptary qujattar men usynystar almasyp jatyr.
– Pákistannyń deldaldyǵymen ótken ıran-amerıkalyq kelissózder 14 saǵattan keıin aıaqtaldy. Qazirgi ýaqytta eki taraptyń tehnıkalyq toptary materıaldarmen almasyp jatyr. Kózqaras qaıshylyqtary saqtalǵanyna qaramastan, kelissózder jalǵasady», – delingen Islam respýblıkasy úkimetiniń X áleýmettik jelisindegi habarlamasynda.
Associated Press agenttigi de AQSh pen Iran ókilderiniń ondaǵan jyldardan bergi eń joǵary deńgeıdegi betpe-bet kezdesý ótkizgenin habarlady. Agenttik málimetinshe, kelissózder barysynda aımaqtaǵy qaqtyǵysty toqtatý, Ormýz buǵazyndaǵy keme qatynasyn qalpyna keltirý jáne óńirlik qaýipsizdik máseleleri qaralǵan.
Sondaı-aq aldyńǵy raýnd barysynda taraptar birqatar túıtkildi máseleler boıynsha ózara túsinistikke kele almaǵan.
The Guardian basylymy negizgi kelispeýshilik Ormýz buǵazynyń mártebesi men aımaqtaǵy áskerı áreketterdi toqtatý máselelerine qatysty bolyp otyrǵanyn jazdy.
Sarapshylardyń pikirinshe, kelissózderdiń jalǵasýy Taıaý Shyǵystaǵy ahýaldy turaqtandyrý jáne munaı jetkizilimine qatysty táýekelderdi azaıtý turǵysynan mańyzdy qadam bolýy múmkin.
Eske sala ketsek, buǵan deıin AQSh pen Iran kelissózderi Islamabadta jalǵasyp jatqanyn jazdyq.
