AQSh pen Iran 19 maýsym kúni Shveıtsarııada beıbit kelisimge qol qoıady
ASTANA. KAZINFORM – AQSh pen Iran arasyndaǵy beıbit kelisimge qol qoıý rásimi 19 maýsym, juma kúni Shveıtsarııada ótedi. Bul týraly eki el arasyndaǵy kelissózderde deldal bolyp otyrǵan Pákistannyń premer-mınıstri Shahbaz Sharıf málimdedi. Aqparatty AQSh prezıdenti Donald Tramp ta rastady, dep jazdy DW.
Shahbaz Sharıf eki tarapqa da qaqtyǵysty dıplomatııalyq jolmen sheshýge umtylǵany úshin alǵys aıtyp, deldaldyq kórsetken Qatarǵa, sondaı-aq osy baǵyttaǵy zor úlesi úshin Saýd Arabııasy men Túrkııaǵa rızashylyǵyn bildirdi.
– Endi kelisimge qol jetkizilgen soń, deldaldar osy aptada birqatar kezdesýler uıymdastyrady. Kelisimdi iske asyrý aldyndaǵy bul talqylaýlar tehnıkalyq kelissózder men resmı qol qoıý rásimine negiz bolady, – dedi Sharıf.
Tramp Ormýz buǵazyndaǵy AQSh blokadasynyń alynǵanyn jarııalady
AQSh prezıdenti Donald Tramp óziniń Truth Social áleýmettik jelisinde Iranmen beıbit kelisimge «endi qol jetkizilgenin» málimdedi. Sonymen qatar Aq úı basshysy AQSh áskerı-teńiz kúshteriniń Ormýz buǵazyndaǵy blokadasyn alyp tastaý týraly sheshim qabyldaǵanyn habarlady.
– Osy arqyly men Ormýz buǵazyn kemelerdiń erkin ótýi úshin ashýǵa ruqsat beremin jáne bir mezgilde AQSh ÁTK tarapynan teńiz blokadasyn dereý toqtatýdy buıyramyn. Álemniń barlyq kemeleri, qozǵaltqyshtaryńyzdy iske qosyńyzdar. Munaı aǵylsyn! – dep jazdy Tramp.
AQSh vıtse-prezıdenti Djeıms Devıd Vens kelisimge Jenevada qol qoıý rásimine qatysýdy josparlap otyrǵanyn aıtty. Onyń sózinshe, kezdesýge Donald Tramptyń ózi de kelýi múmkin.
Kelisim Lıvanǵa da qatysty bolmaq
Shahbaz Sharıf kelisim týraly málimdemesinde eki tarap barlyq maıdanda, sonyń ishinde Lıvanda da áskerı is-qımyldardy dereý jáne túpkilikti toqtatatynyn jarııalady dep atap ótti.
Kelisimniń Lıvanǵa da taralýy Iran úshin mańyzdy sharttardyń biri bolǵan. Lıvan aýmaǵynda Izraıl Tegeran qoldaıtyn «Hezbolla» qozǵalysyna qarsy áskerı operatsııalar júrgizip keledi.
14 maýsymda Izraıl Beırýttaǵy «Hezbolla» baqylaýyndaǵy aýdandarǵa kezekti áýe soqqylaryn jasap, ony qozǵalys shabýyldaryna jaýap retinde túsindirdi. Al Tramp Izraıl premer-mınıstri Bınıamın Netanıahýdy «mańyzdy kúni» shabýyl jasaǵany úshin synǵa aldy.
– Bıbı bulaı istemeýi kerek edi. Bul maǵan múlde unaǵan joq. Olar («Hezbolla») birneshe shaǵyn zymyran ushyrdy, biraq nysanadan aıtarlyqtaı múlt ketti, – dep keltiredi Tramptyń sózin The Wall Street Journal.
Irannyń málimdemesi
Iran syrtqy ister mınıstriniń orynbasary Kazem Garıbabadı AQSh-pen ýaǵdalastyqtarǵa qol qoıylatynyn rastady. Onyń aıtýynsha, taraptar aldymen «ózara túsinistik týraly memorandýmǵa» qol qoıady.
Garıbabadıdiń sózinshe, sodan keıin 60 kún boıy túpkilikti beıbit kelisimge qol jetkizý jónindegi kelissózder júrgiziledi. Osy kezeńde Iran memorandým talaptarynyń oryndalýyn baqylap otyrady. Óz kezeginde Tramp mundaı kelisimge qol qoıýdy «ózinen buryn eshkimniń qolynan kelmegen jetistik» dep atady.
– Óńir kóshbasshylary alǵash ret olarǵa shynaıy beıbitshilikke qol jetkizýge kómektese alatyn prezıdentti tapty, – dep jazdy AQSh prezıdenti Truth Social jelisinde.
Eske sala ketsek, buǵan deıin AQSh-Iran kelissózderi qalaı júrip jatqanyn jazdyq. Al Tramp Iranmen mámile jeksenbide bekitiletinin málimdegen edi.
