AQSh pen Frantsııa Grýzııanyń «Imedı» telearnasynyń janjaldy sıýjetin qatty synǵa aldy
ASTANA. Naýryzdyń 15-i. QazAqparat - «Reseıdiń Grýzııaǵa shabýyl jasaǵany týraly» grýzınniń «Imedı» telekompanııasynyń arnaıy reportajynyń tóńireginde týyndap otyrǵan janjal halyqaralyq deńgeıge shyqqaly otyr.
Ótken senbi kúni efırden berilgen osy sıýjetti AQSh pen Frantsııa aıyptady, dep habarlady «Rosssııa 24» telearnasy.
Atap aıtqanda, AQSh-tyń Grýzııadaǵy elshisi Djon Bas Grýzııanyń Qoǵamdyq telearnasynyń efırinde sóılegen sózinde, «mundaı reportajdardyń Grýzııanyń qaýipsizdigin nyǵaıtýǵa sep bolmaıtynyn» málim etti. «Bul reportaj jýrnalıstik standarttarǵa da sáıkes emes», dep atap kórsetti AQSh dıplomaty óz sózinde.
Buǵan deıin Frantsııa Syrtqy ister mınıstrliginiń ókili de atalmysh sıýjetti «aqylǵa syımaıtyn jáne tipten orynsyz bastama» dep atap, osynaý oqıǵaǵa qatystylardyń barlyǵynyń jaýapkershilikteri moıyndaryna qoıylatynyna Parıjdiń úmitti ekenin jetkizgen bolatyn.
Óz kezeginde, Grýzııa Prezıdenti Mıhaıl Saakashvılı de, «Imedı» telearnasynyń efırinde oryn alǵan oqıǵaǵa keıip otyrǵanyn málim etti. «Sıýjettiń barysynda ekranda munyń shyndyq emes, ımıtatsııa ekeni jazylýy kerek edi. Biraq, túsindirme baǵdarlamanyń basy men sońynda ǵan jasalǵandyqtan, kóptegen adamdar úreılenip qaldy», dedi M.Saakashvılı óz sózinde.
Esterińizge sala keteıik, senbi kúni keshke «Imedı» telearnasy «Reseıdiń Grýzııaǵa basyp kirgeni jáne M.Saakashvılıdiń qazasy týraly» habarlap, tek habardyń sońynda ǵana munyń «yqtımal oqıǵalardyń stsenarııi» ekenine túsinik bergen. Bul habar Grýzııada úlken dúrbeleń týǵyzdy. Atap aıtqanda, reportajda «Tshınvalda Ońtústik Osetııa basshysy Edýard Kokoıtoǵa qarsy lańkestik jasalǵany, sodan keıin reseılik áskerdiń Grýzııaǵa basyp kirgeni» habarlandy. Odan keıin «úkimet pen prezıdent M.Saakashvılıdiń jedel kóshirilgeni» aıtylsa, birneshe mınýttan keıin telekompanııa M.Saakashvılıdiń azasy týraly jáne N.Býrdjanadzeniń jetekshiligimen halyqtyq úkimettiń qurylǵany týraly» habarlady. Baǵdarlama jarty saǵattaı jalǵasty jáne «Grýzııa áýejaılary men teńiz aılaqtarynyń bombylanyp jatqany týraly» habarlardan keıin, telekompanııa munyń «yqtımal oqıǵanyń damýy týraly arnaıy reportaj» bolǵanyn málim etti.
