AQSh pen Eýropanyń qarym-qatynasy buzylýy múmkin be
ASTANA. KAZINFORM – AQSh pen Ýkraına prezıdentteriniń sátsiz ótken kezdesýinen keıin Donald Tramptyń Reseı-Ýkraına qaqtyǵysyn sheshý jospary aıqyn qıyndyqtarǵa tap bolyp otyr, dep jazdy Kazinform agenttiginiń halyqaralyq sholýshysy.
28 aqpanda Donald Tramp pen Vladımır Zelenskııdiń Aq úıdegi kezdesýi sátsiz aıaqtalǵannan keıin áýelde Ýkraına úshin kóp nárse joǵalǵandaı bolyp kórine bastady. AQSh-tyń kómegin toqtatýy teorııalyq turǵyda Ýkraınany álsiretýi tıis edi. Degenmen, dál geosaıasattaǵy jaǵdaıdyń damýyn boljaý múmkin emestigi Eýropany jumyldyrýǵa májbúr etti.
Zelenskıı Vashıngtonnan keıin birden Ulybrıtanııaǵa ushyp ketti, onda premer-mınıstr Kır Starmermen kezdesip, eýropalyq kóshbasshylardyń sammıtine qatysty. 2 naýryzda olar Ýkraınany ǵana emes, Eýropany qaıta qarýlandyrý jáne shyǵys shekaralardy nyǵaıtý máselelerine qatysty birqatar málimdeme jasady. Sondaı-aq kezdesýde Eýropanyń 2015 jylǵy Mınsk kelisimderine qatysty jaǵdaıdyń qaıtalanýyna jol bermeıtini jáne Ýkraınanyń qaýipsizdik kepildigin alýy kerektigi týraly da aıtyldy.
Zelenskıı Tramptyń josparlaryn buzdy
Tramp Ýkraınanyń AQSh-qa 500 mıllıard dollar kólemindegi qaryzy týraly aıtyp, ol úshin sırek metaldar men ınfraqurylymdy berý kerektigin málim etti. Ýkraına buǵan kelispeı, kelissózder barysynda túzetýler engizdi. Osylaısha, Tramp úshin bul kelisim endi sonshalyqty mańyzdy bolmaı qaldy.
Reseı prezıdenti Vladımır Pýtınmen kelissózder saýda-sattyq formatynda ótýi kerek edi - Tramp úshin bul kelissózder júrgizýdiń logıkalyq jáne eń tanys formaty. Biraq sırek metaldar týraly sharttyń jańa nusqasy oǵan qajetti sharttardy qamtamasyz ete almady. Tramptyń buǵan kóńili tolmaıtyny anyq.
Eýropa men AQSh-tyń qarym-qatynasy
Al eýropalyqtar, Vengrııa premer-mınıstri Vıktor Orbandy qospaǵanda, Ýkraınany jappaı qoldady. Osylaısha, jalpy jaǵdaı ózgerdi. Endi Eýropa Reseımen qarym-qatynastyń negizgi máselesinde AQSh-tan bólek áreket etýde.
Tıisinshe, Zelenskıge bylaısha aıtqanda, Tramptan keshirim suraýdyń qajeti joq. Tramp bolsa budan bylaı Reseımen kúsh pozıtsııasynda kelissóz júrgize almaıdy. Árıne, ekijaqty qarym-qatynasty damytýǵa bolady. Biraq Eýropasyz AQSh-tyń sanktsııalaryn alyp tastaýdyń ózi Reseı ekonomıkasyna úlken áser ete almaıdy.
Qoryta aıtqanda, Tramp qıyn jaǵdaıǵa tap boldy. Eger ol Reseımen Ýkraınasyz, ásirese Eýropasyz kelisim jasasa, ol qalaǵandaı nátıje bermeıdi. Onyń ústine AQSh-tyń ózinde ótkir synǵa ushyraıdy.
Sondyqtan biraz ýaqyttan keıin Tramp basqalaı áreketke kóshýi múmkin. Óıtkeni qazirgi jaǵdaı onyń AQSh tarıhyndaǵy ózi bolǵysy keletin eń qýatty saıasatker atanýyna kómektespeıdi.