AQSh pen Eýropadaǵy bank daǵdarysy bizdiń ulttyq qor men BJZQ aktıvterin kemitken
Avtordyń aıtýynsha, Qazaqstannyń bul turǵydaǵy shyǵyny Shvetsııa, Norvegııa, Saýd Arabııasy men Qatar memleketteriniń derbes jáne zeınetaqy qorlaryna kelgen shyǵynmen salystyrǵanda áldeqaıda eleýsiz.
Ulttyq banktiń Inbusiness.kz saýalyna joldaǵan jaýabyna súıensek, naýryz aıynda bankrotqa ushyraǵan amerıkalyq Silicon Valley Bank (SVB) pen Signature Bank-tiń qundy qaǵazdary Qazaqstannyń ulttyq qory men BJZQ aktvıterin syrttan basqaratyn kompanııalardyń portfelderinde de bolǵan.
«Atalǵan bank aktsııalary ulttyq qor men BJZQ-nyń valıýta portfelderine ındekstik basqarý aıasynda satyp alynǵan bolatyn. Basqarýdyń mundaı túri etalondy ındekske jatatyn qundy qaǵazdardy satyp alýǵa negizdelgen. Bul joly damyǵan elderdegi kompanııalardyń aktsııalaryn biriktiretin MSCI World ındeksi jaıynda sóz bolyp otyr. MSCI World ındeksindegi SVB men Signature Bank-tiń aktsııalar úlesi 2023 jyldyń 13 naýryzynda 0,012% jáne 0,009% bolǵan. Bul aktsııalardyń ulttyq qordaǵy úlesi atalǵan kúni etalondyq ındekstegi úlesten tómen boldy – 0,0016% (SVB) jáne 0,0009% (Signature). SVB men Signature Bank-tiń bankrottyǵynan tabystylyqqa keletin jaǵymsyz áser ulttyq qordyń syrttan basqarýshy portfelderindegi valıýta aktıvteriniń 0,008%-yna teń boldy. Osylaısha ulttyq qordy ınvestıtsııalyq basqarýdan túsetin tabysqa bul aıtarlyqtaı áser etken joq», - delingen Ulttyq bank jaýabynda.
BJZQ aktıvteriniń jaǵdaıy da osyǵan uqsas.
SVB men Signature Bank-tiń bankrottyǵynan tabystylyqqa tıgizetin jaǵymsyz áser BJZQ avtıkteriniń 0,002%-yna teń bolǵan.
Ulttyq bank sarapshylarynyń paıymynsha, bul da BJZQ akvtıterin ınvestıtsııalyq basqarýdyń tabystylyǵyna sonshalyq áser etpegen.
Shveıtsarııalyq Credit Suisse qundy qaǵazyndaǵy ulttyq qor men BJZQ valıýta portfelderi týraly da osyny aıtýǵa bolady.
«Naýryz aıynyń sońynda ulttyq qordyń valıýta portfelderindegi Credit Suisse-niń aktsııalar úlesi 0,0003%, oblıgatsııalar úlesi 0,066% ǵana boldy. Credit Suisse aktıvterin keri baǵalaýdan tabystylyqqa keletin jaǵymsyz áser І toqsannyń aıaǵynda syrttan basqarýshylardyń portfelindegi ulttyq qordyń aktsııalar úlesiniń 0,0036%-yna, oblıgatsııalar úlesiniń 0,0041%-yna teń boldy. BJZQ valıýta portfelderindegi Credit Suisse-niń aktsııalar úlesi - 0,00013%, oblıgatsııalar úlesi - 0,028% ǵana boldy. Credit Suisse aktıvterin keri baǵalaýdan tabystylyqqa keletin jaǵymsyz áser І toqsannyń aıaǵynda syrttan basqarýshylardyń portfelindegi BJZQ aktsııalar úlesiniń 0,0011%-yna, oblıgatsııalar úlesiniń 0,0048%-yna teń boldy. Qazirgi tańda Credit Suisse oblıgatsııalarynyń baǵasy turaqtanǵan», - delingen Ulttyq bank túsindirmesinde.
Aldyn ala málimet boıynsha, ulttyq qordyń aktıvteri naýryzdyń sońynda 58,4 mlrd dollar bolsa, BJZQ aktıvteri 15,4 trln teńge bolǵan.
