AQSh pen Eýropa elderinde Tramptyń saıasatyna qarsy narazylyq aktsııalary ótti
ASTANA. KAZINFORM — AQSh-ta bir kúnde «No Kings» uranymen 3300-den astam aktsııa ótti. Mundaı aktsııa Eýropanyń birneshe elinde de uıymdastyryldy. Ereýilge shyqqandar Tramptyń saıasatyna qarsy narazylyq bildirdi, dep habarlaıdy DW.
Senbi kúni AQSh-tyń kóshelerine on myńdaǵan adam shyǵyp, el prezıdenti Donald Tramp saıasatyna qarsy narazylyq bildirdi. Uıymdastyrýshylardyń málimetinshe, «No Kings» uranymen ótken 3300-den astam aktsııaǵa barlyǵy shamamen 8 mıllıon adam qatysqan. Ereýil kezinde tártip buzýshylyqtar tirkelmegen.
Uıymdastyrýshy azamattyq bastamalar koalıtsııasy Donald Trampty demokratııalyq ınstıtýttarǵa nuqsan keltirip, bılikti shamadan tys shoǵyrlandyrdy dep aıyptaıdy. Sondaı-aq sherýge shyqqandar AQSh pen Izraıldiń Iranǵa qarsy soǵysy jáne ımmıgratsııalyq saıasatty qataıtýyna narazylyqtaryn bildirdi.
Narazylyq aktsııalaryn ótkizýge ótinishter AQSh-tyń barlyq 50 shtatynda berildi, biraq buqaralyq aqparat quraldary Mınnesota shtatyn qańtarda Tramp pen ımmıgratsııalyq bılikke qarsy jappaı narazylyq tolqyny bastalǵan basty núktelerdiń biri retinde kórsetti. Qoǵamdyq narazylyq polıtseı qyzmetkerleriniń eki amerıkandyqty óltirýinen keıin týyndady, olardyń áreketteri men quzyreti AQSh-ta keńinen synǵa alyndy.
Aktsııaǵa qatysqandardyń málimetinshe, ereýilder beıbit túrde ótip, tártip buzýshylyqtar tirkelmegen. Bul sharalar AQSh-tyń saıasatyna, sonyń ishinde mıgratsııa, syrtqy saıasat jáne azamattyq bostandyqtardy nyǵaıtý máselelerine qarsy narazylyq bildirý maqsatynda uıymdastyrylǵan.
AQSh-taǵy ereýil ózge memleketterde de uıymdastyryldy. Atap aıtqanda, Parıj, London jáne Lıssabon sııaqty Eýropa qalalarynda halyq aktsııaǵa ún qosty. Sherýde Trampty «fashıst ári áskerı qylmysker» dep ataǵan plakattar kórindi, dep jazady BBC. Sherýge shyqqandar prezıdentke ımpıchment jarııalaýdy talap etti.
Mundaı narazylyq Germanııanyń Berlın, Gambýrg, Mıýnhen, Maındaǵy Frankfýrt jáne Dıýsseldorf sııaqty iri qalalarda ótti. Berlınde birneshe júzdegen adam AQSh ımmıgratsııalyq qyzmetiniń áreketine narazylyq bildirdi.
Aıta keteıik, buǵan deıin Donald Tramp «Eýropa elderi AQSh-qa járdemdespese, NATO-nyń bolashaǵy bulyńǵyr» dep málimdegen edi.
