AQSh pen Eýropa arasyndaǵy qatynas shıelenisse, álemdegi ekonomıkalyq belsendilik baıaýlaýy múmkin

ASTANA. KAZINFORM — AQSh pen Eýropa arasyndaǵy qatynas shıelenisse álemdegi ekonomıkalyq belsendilik baıaýlaýy múmkin. Bul týraly Ulttyq bank tóraǵasy Tımýr Súleımenov aıtty.

— Syrtqy ortada ınflıatsııalyq qysymnyń álsireýi baıqaldy. Ol álemdegi azyq-túlik naryqtaryndaǵy konıýnktýranyń jaqsarýyna baılanysty. Azyq-túliktiń álemdik baǵasy áli de joǵary deńgeıde. Sıyr etiniń baǵasy álemde eki mándi qarqynmen ósip keledi. Dándi daqyldar baǵasy eki aı boıy kóterilip tur. Al, bıdaı baǵasynyń sharyqtaýy Qara teńiz aımaǵyndaǵy kedergilerge baılanysty. Inflıatsııa iri saýda-seriktesimiz Reseıde qatań aqsha-kredıt sharttarynyń saqtalýynan baıaýlap keledi. Ol ishki suranysty shektep, baǵanyń ósýin toqtatýǵa áser etedi. Eýroodaqta ınflıatsııa qazirdiń ózinde Eýropa ortalyq bankiniń baǵasy boıynsha ortamerzimdi perspektıvada nysanaly deńgeıge jaqyn qalyptasýy tıis, — dedi Tımýr Súleımenov.

Onyń aıtýynsha, AQSh-ta Federaldy rezervtik júıe 2025 jyly jumyspen qamtý táýekelderiniń basym bolýyna baılanysty paıyzdyq mólsherlemeni birtindep tómendete bastady. Al retteýshi bolsa, saqtyq sharasyn saqtap otyr.

— AQSh pen Eýropa arasyndaǵy saýda qarym-qatynasynda joǵary geosaıası táýekelder saqtalyp otyr. Shıelenistiń ósýi álemdik saýda-sattyq pen ekonomıkanyń bólshektený protsesine jetkizýi múmkin. Bul birte-birte halyqaralyq ekonomıkalyq baılanystardyń turaqtylyǵyn buzyp, syrtqy ınflıatsııalyq jaǵdaıdyń nasharlaýyna alyp kelýi yqtımal. AQSh pen Eýropa arasyndaǵy qarym-qatynas shıeleniske jetetin bolsa, álemdegi ekonomıkalyq belsendilik baıaýlaý, onyń ishinde shıkizat taýarlaryna, ásirese, munaıǵa suranys tómendep, jalpy energııa kózderiniń baǵasyna áser etýi múmkin. Qazir Brent markaly munaı baǵasy bazalyq stsenarııge sáıkes, — dedi UB tóraǵasy.

Aıta keteıik, búgin Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 18% deńgeıinde belgileý týraly sheshim qabyldady.