AQSh pen Aýstralııa asa mańyzdy paıdaly qazbalar týraly kelisimge qol qoıdy

ASTANA. KAZINFORM – Eki el aldaǵy jarty jylda asa mańyzdy mıneraldyq jobalarǵa birlesip 3 mlrd dollardan astam ınvestıtsııa salýdy josparlap otyr, dep habarlaıdy Anadolu aqparat agenttigi. 

AQSh prezıdenti Donald Tramp Aýstralııa premer-mınıstri Entonı Albanezeni Aq úıde qabyldady. Taraptar asa mańyzdy mıneraldar men sırek jer elementteri týraly máseleni talqylap, 4-5 aıǵa sozylǵan kelissózden keıin kelisimge keldi.

Aq úı basshysy Aýstralııamen basqa da kóptegen másele boıynsha tyǵyz jumys istep jatqanyn atap ótti. 

– Shamamen bir jyldan keıin bizde asa mańyzdy mıneraldar men sırek jer elementteri kóp bolatyny sonsha, olarmen ne isteý kerektigin bilmeısiz, - dedi ol. 

Aýstralııa premer-mınıstri Albaneze óz kezeginde olar eki el arasyndaǵy jaqsy qarym-qatynastardy nyǵaıtý úshin barlyq múmkindikti paıdalana beretinin atap ótti. Sondaı-aq asa mańyzdy paıdaly qazbalar men sırek jer elementteri týraly búgingi kelisimniń qarym-qatynasty jańa deńgeıge kóteretinin jetkizdi. Ol sonymen qatar kelisimniń 8,5 mlrd dollardy quraıtyn iske asyrýǵa daıyn baǵdarlama ekenin tilge tıek etti. 

Kelissóz qorytyndysy boıynsha eki el basshylary asa mańyzdy paıdaly qazbalar men sırek jer elementteri týraly kelisimge qol qoıdy.

Aldaǵy jarty jylda eki el asa mańyzdy mıneraldar óndirý jobalaryna 3 mlrd dollardan astam ınvestıtsııa salýdy josparlap otyr. Bul jobalarda qalpyna keltiriletin resýrstar quny 53 mlrd dollarǵa baǵalanady.

AQSh Qorǵanys mınıstrligi Batys Aýstralııadaǵy qýattylyǵy jylyna 100 metrıkalyq tonnany quraıtyn zamanaýı gallıı óńdeý zaýytyna ınvestıtsııa salady. Ol eldiń asa mańyzdy mıneraldy óńdeýde ózin-ózi qamtamasyz etý múmkindigin odan ary arttyryp otyr. 

Buǵan deıin Qytaı sırek jer elementteri tehnologııalaryna eksporttyq baqylaýdy kúsheıtetinin habarlaǵan bolatynbyz.