AQSh pen Armenııa beıbit atom salasyndaǵy yntymaqtastyq jóninde kelisimge keldi

ASTANA. KAZINFORM — Armenııaǵa jumys saparymen barǵan AQSh vıtse-prezıdenti Djeı Dı Vens Premer-mınıstr Nıkol Pashınıanmen kezdesti. Kezdesý qorytyndysy boıynsha taraptar atom energııasyn beıbit maqsatta paıdalaný salasyndaǵy yntymaqtastyq týraly kelisim boıynsha kelissózderdiń aıaqtalǵany jóninde birlesken málimdemege qol qoıdy, dep habarlaıdy Kazinform agenttiginiń menshikti tilshisi.

Armenııa Premer-mınıstriniń aıtýynsha, bul kelisim eldiń energetıkalyq kózderin ártaraptandyrýǵa jáne qaýipsiz ári ınnovatsııalyq atom tehnologııalaryn tartýǵa baǵyttalǵan.

Al Djeı Dı Vens bul qujat bolashaq jobalardy júzege asyrýǵa, sonyń ishinde Armenııaǵa amerıkalyq óndiristegi shaǵyn modýldi reaktorlardy jetkizýge múmkindik ashatynyn málimdedi. Onyń sózinshe, yqtımal yntymaqtastyqtyń jalpy kólemi 9 mlrd dollar dep baǵalanyp otyr: onyń shamamen 5 mlrd dollary jabdyqtardy jetkizýge, al taǵy 4 mlrd dollary ıadrolyq otyndy uzaq merzimdi jetkizý men reaktorlarǵa qyzmet kórsetý jónindegi kelisimsharttarǵa baǵyttalmaq.

— Bul shaǵyn modýldi reaktorlar men amerıkalyq tehnologııalar Armenııaǵa jetkiziledi degen sóz. AQSh óziniń ozyq tehnologııalaryn mundaı joǵary senim deńgeıimen óte sırek jaǵdaıda ǵana beredi, — dep atap ótti AQSh vıtse-prezıdenti.

Ol sondaı-aq bul yntymaqtastyq energetıkalyq turaqtylyqqa, qaýipsizdikke jáne jańa jumys oryndaryn qurýǵa yqpal etetinin qosa aıtty.

Sonymen qatar Djeı Dı Vens AQSh Armenııaǵa 11 mln dollar kóleminde barlaý drondary tehnologııalaryn satýdy maquldaǵanyn habarlady.

Buǵan deıin Armenııa modýldik atom elektr stantsııasyn salý múmkindigin qarastyryp jatqany týraly jazdyq.