AQSh Parsy shyǵanaǵynda Irannyń dron tasymaldaýshy kemesin joıdy
ASTANA. KAZINFORM - Iranǵa qarsy «Epıkalyq qahar» operatsııasynyń basynda AQSh 1980-jyldardaǵy ıran-ırak soǵysyna qatysýshynyń qurmetine atalǵan Shahid Bahman Bagheri kemesin sýǵa batyrdy, dep habarlaıdy Kazinform agenttigi DW-ge silteme jasap.
Islam revolıýtsııasy saqshylar korpýsynyń Áýe teńiz kúshteriniń kemesi qaıta jabdyqtalǵan konteıner tasymaldaýshy bolǵan jáne áýelde soqqy beretin ushqyshsyz apparattardy ornalastyrýǵa arnalǵan álemdegi alǵashqy keme sanalǵan. Drondardan bólek, ol tikushaqtar, zymyrandar jáne shaǵyn katerler alyp júre alǵan.
Die Welt basylymynyń habarlaýynsha, Shahid Bahman Bagheri Ekinshi dúnıejúzilik soǵystan beri sýǵa batyrylǵan eń iri áskerı keme. AQSh Qarýly kúshteri qolbasshylyǵynyń málimetinshe, keme operatsııa bastalǵannan keıin kóp uzamaı, ıaǵnı 28 aqpan kúni Parsy shyǵanaǵynda joıylǵan. Onyń sý yǵystyrylymy shamamen 42 myń tonnany quraǵan.
Salystyrý úshin, 1941 jyly sýǵa batyrylǵan nemistiń Bismarck lınkorynyń sý yǵystyrylymy 50 myń tonnadan asqan, al 2022 jyldyń sáýirinde Qara teńizde batqan Moskva zymyran kreıseriniki — shamamen 11,5 myń tonna.
Aıta keteıik, keme eki jylda jasalǵan. Alǵashqy synaqqa ol 2024 jyldyń qarasha aıynyń sońynda Bender-Abbas tirkeý portynan shyqqan. Resmı túrde qoldanysqa 2025 jylǵy 6 aqpanda engizilgen.
Dron tasymaldaýshy teńiz tolqyny 9 ball bolǵanǵa deıin áreket ete alady jáne júris qashyqtyǵy 22 myń teńiz mıline deıin jetedi. Bul oǵan janarmaı quımaı jáne porttarǵa kirmeı uzaq ýaqyt alys saparda bolýǵa múmkindik beredi. Bortynda ushqyshsyz apparattarǵa arnalǵan uzyndyǵy 180 metrlik ushý-qoný jolaǵy bar.
Kemede segiz «Nýr» kemege qarsy zymyrany, segiz Kowsar-222 zenıttik zymyrany, 30 mm avtomatty artıllerııalyq qondyrǵy, sondaı-aq 20 mm zeńbirekter bar. Olardyń ishinde, keı derekter boıynsha, «Gatlıng» tıpti qondyrǵylar men qashyqtan basqarylatyn týrelder bar.
Osy ýaqytta Iran Ormýz buǵazynyń tolyq baqylaýda ekenin málimdedi. Bul munaı men gaz eksporty úshin strategııalyq mańyzdy baǵyt. El áýe teńiz kúshteri ókili Mohammad Akbarzade bul aımaq arqyly ótetin kez kelgen keme Iran zymyrandary men drondarynyń nysanyna aınalýy múmkin ekenin eskertti.
Buǵan deıin AQSh prezıdenti Donald Tramp buǵaz arqyly ótken kezde munaı tankerlerin qorǵaýǵa amerıkalyq áýe teńiz kúshteri daıyn ekenin málimdegen. Óz kezeginde AQSh armııasy qaqtyǵys bastalǵaly beri 17 ıran kemesi, sonyń ishinde bir súńgýir qaıyq joıylǵanyn habarlady.
Eske salaıyq, Ormýz buǵazy álemdegi negizgi munaı baǵyttarynyń biri. Ol arqyly kún saıyn shamamen 20–21 mln barrel munaı men munaı ónimderi tasymaldanady. Bul teńiz arqyly tasymaldanatyn jetkizilimderdiń shamamen 20%-y.
Sondaı-aq ol alıýmınıı, qant jáne tyńaıtqysh sııaqty basqa da shıkizat túrleri úshin negizgi baǵyt sanalady.
Baǵyttaǵy kez kelgen buzylys energııa tasymaldaýshylar baǵasynyń birden ósýine ákeledi: eksporttaýshylar úshin bul tabystyń artýy bolsa, ımporttaýshylar úshin — ınflıatsııa, janarmaıdyń qymbattaýy jáne ekonomıka úshin jańa táýekelder.
Ormýz buǵazy jabyldy. Endi munaı naryǵyn ne kútip turǵanyn myna materıaldan oqyńyzdar.
