"AQSh ózge elderdiń ishki isine kıligýin qoısa, álem áldeqaıda jaqsara túser edi» - Sırııa prezıdenti Bashar Asad
ÁBÝ-DABI. 27 qyrkúıek. QazAqparat - Sırııa Prezıdenti Bashar Asad sheteldik buqaralyq aqparat quraldarymen belsendi aralasýdy jalǵastyrýda. Tamyzda Sırııa basshysy Reseıdiń «Izvestııa» gazetine, qyrkúıekte Qytaıdyń memlekettik CCTV telearnasyna suhbat berdi.
Osy joly B.Asadpen tikeleı suhbattasý múmkindigine Venesýelanyń «Telesýr» telearnasynyń tilshisi ıe boldy. Latynamerıkandyq jýrnalıstpen suhbattasý kezinde Sırııa basshysy hımııalyq qarýdy joıý mindetin oryndaǵan kúnniń ózinde AQSh-tan elge degen qaýip bar dep málimdedi.
Bashar Asad taǵy da lańkesterdi hımııalyq qarý qoldanǵany úshin aıyptady. Ol Sırııa bıliginiń kóteriliske qatysýshylardan osy ýly zattar shyǵarylǵan laboratorııalar men áskerı hımııalyq zat salynǵan kapsýlalardy tapqanyn aıtty. «Munyń bári hımııalyq shabýylǵa lańkester jaýapty ekenin dáleldeıdi», - dedi B.Asad.
Sırııa basshysy suhbatynda kenetten AQSh saıasatyn synǵa aldy. Onyń sózine qaraǵanda, «AQSh ózge elderdiń ishki saıasatyna kıligýdi qoıǵanda, álem jaqsara túsetin edi».
Sırııa Prezıdenti B.Asad: «Naqty faktilerge toqtalaıyqshy. AQSh-tyń basyp kirýinen Iraktaǵy jaǵdaı túzeldi me? Aýǵanstan, Týnıs, Lıvııa, Sırııadaǵy jaǵdaı durystaldy ma? Qaı eldiń jaǵdaıy túzeldi? Ońtústik Amerıkadaǵy jaǵdaıǵa qarańyz. Shyndyǵynda, Amerıka Qurama Shtattary aralasýdy qoıǵanda álemdegi jaǵdaı túzeledi. B.Obama óz sózinde «Biz búkil álemniń máselelerin sheshe almaımyz» degen bolatyn. Meniń de aıtarym sol - álemdik máselelerdi AQSh sheshpeı-aq qoısyn».
B.Asad: «Bizde elimizge qarsy astyrtyn oılastyrylǵan aýqymdy qastandyqqa qarsy turýdan, óz ustanymdarymyz ben múddelerimizdi, halqymyzdy qorǵaýdan basqa amalymyz joq», - dep qosty.
