AQSh ózdiginen deportatsııalanatyn zańsyz sheteldikterge 1000 dollar tóleıdi

ASTANA. KAZINFORM – Іshki qaýipsizdik mınıstrligi AQSh-tan ketý úshin CBP Home qosymshasyn paıdalanatyn adamdarǵa jol aqysyn tóleýge kómek kórsetip, 1000 dollar bóletinin málimdedi, dep habarlaıdy NBC News. 

Bılik zańsyz ımmıgranttardy elden deportatsııalanýǵa kóndirýge kúsh salyp otyr. 

Dúısenbide federaldy agenttik CBP Home qosymshasyn Qurama Shtattardan óz erkimen ketý úshin paıdalanatyndarǵa «óz eline qaıtýyn jeńildetý úshin» kómek jáne «olardyń elge oralýy qosymsha arqyly rastalǵannan keıin» 1000 dollar alatynyn jarııalady.

AQSh-tyń Іshki qaýipsizdik mınıstri Krıstı Noemniń málimdeýinshe, ózin-ózi deportatsııalaý – «AQSh-tan qamaýǵa alynbaı ketýdiń eń jaqsy, qaýipsiz jáne únemdi joly». 
Vedomstvonyń málimetinshe, AQSh salyq tóleýshileri bir deportatsııa úshin 17 121 dollar jumsaıdy. Federaldy agenttik ózin-ózi deportatsııalaý bul shyǵyndy, tipti qolma-qol tólemdi esepke alǵanda 70% tómendetedi dep kútip otyr.

Vashıngtondaǵy Kóshi-qon saıasaty ınstıtýtynyń málimetinshe, osy jyly elden óz erkimen ketkeni týraly habarlaý úshin kem degende 5 myń ımmıgrant CBP Home qyzmetin paıdalanǵan. 

CBP Home qosymshasynyń júktelýin qadaǵalaıtyn Appfigures kompanııasynyń málimetinshe, 2025 jyldyń basynan beri qosymsha shamamen 300 myń ret júktelgen. 
Naýryzda Tramp ákimshiligi Baıden dáýirindegi AQSh-qa kirýge arnalǵan CBP One baǵdarlamasyn CBP Home-ǵa ózgertip, oǵan 200 mln dollar jumsady.

Donald Tramp deportatsııalaýǵa ushyraǵan mıgranttar AQSh-tan ketpese, olarǵa kúnine 998 dollar aıyppul salyp, ony tólemegen jaǵdaıda múlkin tárkileýdi josparlap otyrǵanyn jazǵan bolatynbyz.