AQSh óz azamattaryna Izraıl men Lıvanǵa barmaýǵa keńes berdi
ASTANA. KAZINFORM – AQSh Taıaý Shyǵystaǵy ahýaldyń shıelenisýine baılanysty óz azamattaryna Izraıl men Lıvanǵa barmaýǵa keńes berdi. Sondaı-aq óńirdegi ózge elderge sapar josparlaryn qaıta qaraý usynyldy, dep habarlaıdy Anadolu Ajansı.
AQSh-tyń Izraıldegi elshiligi taratqan habarlamada óńirde júrgen amerıkalyqtarǵa barynsha saq bolýǵa jáne qaýipsizdik jaǵdaıyna qatysty jańalyqtardy muqııat baqylaýǵa keńes berilgen.
– Óńirge saparlaýdy nemese tranzıtpen ótýdi josparlap otyrǵan azamattarǵa áýe kompanııalarynan reısterdiń kestege saı oryndalatynyn aldyn ala naqtylap alý usynylady. Sondaı-aq basyp alynǵan Batys jaǵalaý men Gaza sektoryna barýdy josparlaǵan kezde qazirgi qaýipsizdik jaǵdaıyn eskergen jón, – delingen elshilik habarlamasynda.
Lıvannyń resmı NNA agenttiginiń málimetinshe, dál osyndaı eskertýdi AQSh-tyń Beırýttaǵy elshiligi de jarııalaǵan.
Aıta keteıik, buǵan deıin AQSh Iranǵa qarsy jańa soqqylar legi bastalǵanyn málimdegen bolatyn.
