AQSh óz azamattaryn Irannan shuǵyl túrde ketýge shaqyrdy
ASTANA. KAZINFORM – AQSh Memlekettik departamenti amerıkalyq azamattarǵa Irannan shuǵyl túrde ketýge keńes berdi. Buǵan eldiń áýe keńistiginiń ishinara ashylýy men áýe qatynasynyń qaıta jandanýy sebep boldy, dep habarlaıdy Anadolu Agency.
Bul týraly AQSh-tyń Tegeran qalasyndaǵy vırtýaldy elshiligi jarııalaǵan qaýipsizdik jónindegi habarlamada aıtylǵan.
21 sáýirdegi jaǵdaı boıynsha Irannyń áýe keńistigi ishinara ashylyp, shekteýli kólemde áýe reısteri qaıta iske qosyldy.
AQSh azamattaryna elden múmkindiginshe tezirek shyǵý, jergilikti buqaralyq aqparat quraldaryndaǵy jańartýlardy baqylaý jáne qoljetimdi reıster týraly aqparatty áýe kompanııalarynan naqtylaý usynyldy.
Sondaı-aq Memlekettik departament Irannan Armenııa, Ázerbaıjan, Túrkııa jáne Túrikmenstan arqyly qurlyqpen shyǵý baǵyttaryn da atady.
Budan bólek, Aýǵanstan, Irak jáne Pákistan shekarasyna jaqyn aımaqtarǵa barmaý jóninde eskertý jasaldy.
Buǵan deıin Irannyń BUU janyndaǵy turaqty ókili Amır-Saıd Iravanı AQSh-pen kelissózderdiń jańa kezeńi Vashıngtonnyń blokadasy toqtatylǵan jaǵdaıda ǵana múmkin bolatynyn málimdep, AQSh-ty «atysty toqtatý rejımin buzdy» dep aıyptaǵan edi.
Sondaı-aq Iran AQSh-pen kelissózge nege qatyspaıtynyn túsindirdi.
