AQSh óz azamattaryn Irannan ketýge shaqyrdy

ASTANA. KAZINFORM — AQSh Memlekettik departamenti Irandaǵy amerıkalyq azamattarǵa shuǵyl eskertý jasap, olardy Armenııa jáne Túrkııa shekarasy arqyly elden shyǵý múmkindigin qarastyrýǵa shaqyrdy. Bul týraly Report agenttigi jazdy.

Bul eskertý jappaı narazylyqtar men demonstratsııalardy kúshpen basyp-janshý kezinde «Irandaǵy vırtýaldy AQSh elshiligi» saıtynda jarııalanǵan.

Elden kete almaıtyn amerıkandyqtarǵa óz úıinde nemese basqa qaýipsiz ǵımaratty panalap, azyq-túlik, sý, dári-dármek jáne basqa da qajetti zattarmen qamtylýy usynyldy.

Sondaı-aq Memlekettik departament AQSh azamattaryna «tómen profıldi saqtaýǵa», demonstratsııalar ótetin jerlerden aýlaq bolýǵa, josparlardy túzetýge daıyn bolýǵa jáne AQSh úkimetiniń kómegine táýeldi emes tótenshe jaǵdaı josparyn qurýdy usynady.

Amerıkanyń Iranǵa qatysty 4-deńgeıdegi saıahat týraly eskertýi óz kúshinde. Tegerandaǵy Shveıtsarııa elshiligi AQSh-tyń Irandaǵy múddelerin qorǵaıdy, sonymen qatar amerıkandyq azamattarǵa jedel qyzmet kórsetedi.

Eske salaıyq, Eýroparlament Iran dıplomattarynyń óz ǵımarattaryna kirýine tyıym saldy.