AQSh Ortalyq jáne Shyǵys Eýropaǵa 3000 ásker jibermek

NUR-SULTAN. QazAqparat – AQSh prezıdenti Djo Baıden aldaǵy kúnderi NATO kúshterine qoldaý kórsetý úshin Ortalyq jáne Shyǵys Eýropaǵa 3000 áskerı qyzmetkerin jiberýdi josparlap otyr. Bul týraly sársenbi kúni Pentagon ókili Djon Kırbı málim etti, dep habarlaıdy QazAqparat Euronews aqparat agenttigine silteme jasap.

Onyń aıtýynsha, qazir Germanııada ornalasqan myńǵa jýyq sarbaz Rýmynııaǵa qaıta jiberiledi, óıtkeni Reseı Ýkraınamen shekaradaǵy áskerı quramyn qysqartýǵa esh nıet tanytpaıdy, al Batys bul elge Reseıdiń basyp kirýinen qaýiptenedi.

Qazirgi kezde Rýmynııada 900 amerıkalyq sarbaz bar. Aldaǵy ýaqytta olarǵa Frantsııa jiberetin kúshter de qosylýy tıis.

«Qurama Shtattar Frantsııamen jáne bizdiń barlyq odaqtastarymyzben keńesýdi jáne úılestirýdi jalǵastyrady, bul kúshterdi ornalastyrýda bir-birimizdi tolyqtyrý úshin qajet», - dedi Kırbı.

Sonymen qatar, Germanııa men Polshaǵa AQSh armııasynyń jedel áreket etýshi negizgi kúshi bolyp tabylatyn 82-shi áýe-desanttyq dıvızııasynyń 2000 áskeri jiberiledi. Onyń ishinde 1700 adam Polshaǵa qaıta jiberiledi, al qalǵandary Germanııadaǵy amerıkalyq kúshterdiń áreketin úılestirýge kómektesedi. Qazir Polshada 5 myńǵa jýyq AQSh áskeri bar.

Aq úıden qosymsha kontıngentti ýaqytsha aýdarý jańa barlaý derekterin alýmen baılanysty emes ekenin atap ótti.

Interfaks agenttiginiń habarlaýynsha, Reseı Syrtqy ister mınıstriniń orynbasary Aleksandr Grýshko AQSh-tyń Eýropaǵa ásker jiberý týraly sheshimin synǵa aldy. Sheneýnik bul áreketterdi «saıası sheshimder úshin óristi taryltatyn» «destrýktıvti qadamdar» dep atady.