AQSh Ormýz buǵazynda kemege jasalǵan shabýyldan keıin Iran nysandaryna soqqy berdi
ASTANA. KAZINFORM- AQSh áskeri Ormýz buǵazynda júk kemesine jasalǵan shabýylǵa jaýap retinde Irannyń áskerı nysandaryna soqqy bergenin jarııalady, dep habarlaıdy BBC.
Olardyń málimetinshe, nysanaǵa zymyrandar men ushqyshsyz ushý apparattary saqtalǵan qoımalar, sondaı-aq jaǵalaýdaǵy radıolokatsııalyq stantsııalar alynǵan. Buǵan jaýap retinde Islam revolıýtsııasy Saqshylar korpýsy AQSh-tyń aımaqtaǵy áskerı nysandaryna shabýyl jasaǵanyn málimdedi
- Iran kúshteriniń saýda keme qatynasyna qarsy negizsiz agressııasy atysty toqtatý rejımin anyq buzdy. Irannyń qaýipti minez-qulqy keme qatynasy erkindigine nuqsan keltiredi, óıtkeni osy mańyzdy halyqaralyq saýda dálizi arqyly júk tasymalynyń kólemi artyp keledi, - dep málimdedi AQSh Ortalyq qolbasshylyǵy (CENTCOM) X-te.
Qolbasshylyq AQSh qarýly kúshteri “qaýipsiz ótýdi úılestirýdi jáne buǵazdan ótetin saýda kemelerine qoldaý kórsetýdi jalǵastyratynyn” qosyp ótti. IRSK bul shabýylǵa AQSh kúshterine qarsy soqqylarymen jaýap bergenin málimdedi, biraq egjeı-tegjeıli aqparat bergen joq.
Buǵan deıin AQSh prezıdenti Donald Tramp Tegerannyń buǵaz arqyly ótip bara jatqan Sıngapýr týy ilingen, Evergreen kompanııasyna tıesili Ever Lovely konteınerlik kemesine shabýylyna baılanysty atysty toqtatý rejımin buzǵanyn málimdedi.
— Iran Islam Respýblıkasy Ormýz buǵazy arqyly ótken kemelerge keminde tórt «kamıkadze» shabýyldaýshy ushqyshsyz ushý apparatyn ushyrdy. Drondardyń biri úlken jáne óte qymbat júk kemesiniń joǵarǵy palýbasyna tústi. Keme zaqymdandy, biraq saparyn jalǵastyra aldy. Biz taǵy úsh ushqyshsyz ushý apparatyn atyp túsirdik. Bul bizdiń atysty toqtatý týraly kelisimimizdi aqylsyz buzý ekeni anyq, - dep jazdy ol Truth Social áleýmettik jelisinde.
Osy arada AQSh vıtse-prezıdenti Djeı Dı Vens eger Iran «ózara túsinistik týraly memorandým qalaı iske asyrylatynymen kelispese, olar telefondy kótere alatynyn” atap ótti.
«Alaıda zorlyq-zombylyqqa jaýap zorlyq-zombylyq bolady», - dep qosty Vens.
Aıta keteıik, buǵan deıin AQSh Iranǵa qarsy munaı sanktsııalaryn ýaqytsha toqtatqany habarlanǵan bolatyn.
