AQSh Ormýz buǵazynda keme qatynasyn qamtamasyz etý úshin koalıtsııa qurýdy usyndy
ASTANA. KAZINFORM – Bul bastama keme qozǵalysynyń kúrt tómendeýi aıasynda ony qalpyna keltirýge baǵyttalǵan, dep habarlaıdy Kazinform agenttiginiń Taıaý Shyǵystaǵy menshikti tilshisi.
Tramp ákimshiligi basqa elderdi Ormýz buǵazynda keme qatynasyn qalpyna keltirýge múmkindik beretin jańa halyqaralyq koalıtsııaǵa qosylýǵa shaqyryp otyr. Bul týraly sársenbide AQSh Memlekettik departamentiniń ishki telegrammasyna silteme jasaı otyryp The Wall Street Journal gazeti habarlady.
Qujatqa sáıkes, «Teńizdegi erkindikti qamtamasyz etý koalıtsııasy» (Maritime Freedom Construct) dep atalatyn bastama aqparat almasý, dıplomatııalyq úılestirý jáne kemelerdiń strategııalyq sý joly arqyly erkin ótýin qalpyna keltirý úshin sanktsııalardy qoldanýdy kózdeıdi.
AQSh elshilikterine jiberilgen jedelhatta dıplomattarǵa shetel memleketterin koalıtsııa sheńberinde «dıplomatııalyq jáne/nemese áskerı seriktester» retinde áreket etýge kóndirý tapsyrylǵan.
- Sizdiń qatysýyńyz bizdiń keme qatynasy erkindigin qalpyna keltirý jáne jahandyq ekonomıkany qorǵaý boıynsha ujymdyq múmkindigimizdi nyǵaıtady, - delingen qujatta.
Atap ótilgendeı, koalıtsııany AQSh Memlekettik departamenti men AQSh Qarýly kúshteri Ortalyq qolbasshylyǵy birlesip júzege asyryp,Ulybrıtanııa men Frantsııanyń bastamalaryn qosa alǵanda, qoldanystaǵy teńiz bastamalaryn tolyqtyrady.
Bul bastama buryn álemdegi munaı men gazdyń besten bir bóligin qamtamasyz etken Ormýz buǵazy arqyly trafıktiń azaıýy aıasynda usynylǵan.
AQSh pen Izraıldiń 28 aqpanda Iranǵa qarsy áskerı naýqany bastalyp, keıinnen Tegeran blokada jasaǵannan beri bul aımaqta keme qatynasy is júzinde toqtatyldy.
Osyǵan deıin Trampqa Iranǵa qarsy áskerı áreketterdiń jańa nusqalary usynylatynyn habarladyq.
